ކުރިއަށް އޮތް ރޯދަ މަހު މާލޭ ވިޔަފާރި ބަނދަރުން މުދާ އަރުވާ ބޭލުމާއި، މުދާ ދޫކުރުމުގެ މަސައްކަތް ކުރިއަށް ގެންދާނެ ގަޑިތައް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މިއަދު އިއުލާނުކޮށްފިއެވެ.

އެމްޕީއެލުން ނެރުނު ނޫސް ބަޔާނެއްގައިވާ ގޮތުން، ރޯދަ މަހުގެ މަސައްކަތްތައް ރޭވިފައިވަނީ އާންމުންނާއި ވިޔަފާރިވެރިންނަށް ލުއިފަސޭހަވާނެ ގޮތަކަށެވެ.

އެމްޕީއެލް އިން ބުނިގޮތުގައި ބޯޓު ފަހަރުން މުދާ އަރުވައި ބޭލުމުގެ މަސައްކަތް ހޮނިހިރު ދުވަހުން ފެށިގެން ބުރާސްފަތި ދުވަހަށް ކުރިއަށްދާނީ ހެނދުނު 9:00 އިން ހަވީރު 4:00 އަށް އަދި ރޭގަނޑު 9:00 އިން ދަންވަރު 1:30 އަށެވެ. ހުކުރު ދުވަހު މި މަސައްކަތް ކުރިއަށްދާނީ ހަމައެކަނި ރޭގަނޑު 9:00 އިން ދަންވަރު 1:30 އަށެވެ. މާލެ އަދި ހުޅުމާލޭގެ ކޮންޓެއިނާ ޝިފްޓިންގެ މަސައްކަތްތައް ވެސް ކުރިއަށްދާނީ ހަމަ މި ގަޑިތަކުގައެވެ.

މުދާ ކްލިއާ ކުރުމަށް އެސައިން ކުރުމުގެ މަސައްކަތް ހޮނިހިރު ދުވަހުން ބުރާސްފަތި ދުވަހަށް ކުރިއަށްދާނީ ހެނދުނު 9:00 އިން މެންދުރު 1:00 އަށް އަދި ރޭގަނޑު 9:00 އިން 10:30 އަށެވެ. ނަމަވެސް ހުކުރު ދުވަހު މި ހިދުމަތް ބަންދުވާނެއެވެ. އާންމު ހިދުމަތުގެ ދަށުން ކްލިއާ ކުރާ ސަރަހައްދަށް ގެންދިއުމަށް ނޯޓުކޮށްދެވޭނީ ދުވާލަކު 150 ޓީއީޔޫސް އެވެ. ބައި ދުވަހެއް ނަމަ ނޯޓުކޮށްދެވޭނީ 100 ޓީއީޔޫސް ކަމަށް އެމްޕީއެލުން ބުނެއެވެ.

އޮންލައިންކޮށް ޝިފްޓިން އަށް ރިކްއެސްޓް ކުރަން ފެށޭނީ ހެނދުނު 10:00 ގައެވެ. އަދި ރިކްއެސްޓް ކުރުމުގެ ސުންގަޑިއަކީ ޖެހިގެން އަންނަ ދުވަހުގެ ހެނދުނު 9:00 އެވެ. މީގެ އިތުރުން ނޯމަލް އެކްސްޕްރެސް އަށް ނޯޓު ކުރެވޭނީ ރޭގަނޑު 8:30 އިން ޖެހިގެން އަންނަ ދުވަހުގެ 10:30 އަށެވެ. ޑެއިލީ އެކްސްޕްރެސް އަށް ނޯޓު ކުރެވޭނީ ހެނދުނު 9:15 އިން މެންދުރުފަހު 1:00 އަށެވެ.

އެމްޕީއެލުން އިތުރަށް ބުނެފައިވަނީ މައިބަނދަރުގެ ހިދުމަތްތައް ހޯދުމަށް ޕޯޓަލް މެދުވެރިކޮށް ހުޅުވާލެވިފައިވާނެ ކަމަށެވެ. މި ބަދަލުތަކާއެކު ރޯދަ މަހު މުދާ ބޭލުމާއި ދޫކުރުމުގެ ކަންކަން ހަރުދަނާކަމާއެކު ކުރިއަށްދާނެ ކަމަށް އެ ކުންފުނިން އުންމީދު ކުރެއެވެ