ލްޑިވްސް ބްލަޑް ސާވިސަސް (އެމްބީއެސް) އަށް ދިމާވެފައިވާ ލޭ ލިބުމުގެ ދަތިކަމަށް ހައްލެއް ހޯދުމަށް އެހީތެރިވުމުގެ ގޮތުން މޯލްޑިވްސް ޕޯޓްސް ލިމިޓެޑް (އެމްޕީއެލް) އިން އިސްނަގައިގެން "ޕޯޓް ކޮމިއުނިޓީ ބްލަޑް ޑޮނޭޝަން ކޭމްޕް" މިއަދު ފަށައިފިއެވެ.
އެމްޕީއެލްގެ ހެޑް އޮފީހުގައި ކުރިއަށްދާ މި ކޭމްޕަކީ މިއަދު ހެނދުނު 11:00 އިން ފެށިގެން އިރުއޮއްސި 18:30 އާ ހަމައަށް ކުރިއަށް ގެންދާ ހަރަކާތެކެވެ. މި ކޭމްޕުގައި އެމްޕީއެލްގެ މުވައްޒަފުންގެ އިތުރުން، މާލޭ ވިޔަފާރި ބަނދަރުގައި މަސައްކަތްކުރާ ފަރާތްތަކާއި އާންމުންނަށް ވެސް ލޭ ހަދިޔާކުރުމުގެ ފުރުސަތު ވަނީ ހުޅުވާލާފައެވެ.
މި ހަރަކާތް ކުރިއަށްގެންދަނީ އެމްޕީއެލް އާއި އެމްބީއެސްގެ އިތުރުން، މާލެ ސިޓީ ގްރޫޕް އޮފް ހޮސްޕިޓަލްސް އަދި ލޭ އެޕްއާ ގުޅިގެންނެވެ. ރާއްޖޭގެ ބްލަޑް ބޭންކްގައި ހުރި ލޭ މަދުވެ، އާންމުންގެ އެހީތެރިކަމަށް އެމްބީއެސްއިން އެދިފައިވާތީ، އެ ކުންފުނީގެ ގިނަ އަދަދެއްގެ މުވައްޒަފުން މިހާރުވެސް މި ކޭމްޕުގައި ބައިވެރިވެ ލޭ ހަދިޔާކުރަމުންދާ ކަމަށް އެމްޕީއެލުން ބުނެއެވެ.
ލޭ ހަދިޔާ ކުރެވޭނީ އުމުރުން 18 އަހަރު ފުރިފައިވާ، ބަރުދަނުގައި 45 ކިލޯއަށް ވުރެ މަތީގެ މީހުންނަށެވެ. ލޭ ހަދިޔާ ކުރަން ދިއުމުގެ ކުރިން ހަ ގަޑިއިރުގެ ނިދި ހަމަކުރުމަށާއި، ގަޑިއެއްހާއިރު ކުރިން ކައިގެން ދިއުމަށް އެމްބީއެސްއިން އިރުޝާދު ދެއެވެ.
މި ކޭމްޕުގެ އިތުރުން، ލޭ ހަދިޔާ ކުރަން ބޭނުންވާ ފަރާތްތަކަށް ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:00 އިން ރޭގަނޑު 8:00 އަށް ހުޅުމާލެ ފޭސް 1 ގައި ހުންނަ އޮރެންޖު ހިޔާއަށް ގޮސް ވެސް ލޭ ހަދިޔާކުރެވޭނެ އިންތިޒާމު ވަނީ ހަމަޖައްސާފައެވެ.
