ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލުމަށް ހުށަހެޅި އިސްލާހު މަޖިލީހުގެ މިނިވަން މުއައްސަސާތަކުގެ ކޮމިޓީން ފާސްކޮށްފި އެވެ.
ސަރުކާރުގެ ފަރާތުން މި ބިލު ހުށަހެޅުއްވީ އިނގުރައިދޫ ދާއިރާގެ މެމްބަރު އިބްރާހީމް ފަލާހެވެ. ރައްޔިތުންގެ މަޖިލީހުގެ އިންތިހާބާއި ރިޔާސީ އިންތިހާބު އެކުއެކީގައި ބޭއްވުމަށް ހުށަހަޅާފައިވާ އިސްލާހު ދިރާސާކުރުމަށް މިއަދު ބޭއްވި 5 މިނެޓުގެ ބައްދަލުވުމުގައި މި ބިލު ފާސްކުރީ ބައްދަލުވުމަށް ވަޑައިގެންނެވި މެމްބަރުންގެ އިއްތިފާގުން ނެވެ.
ދެ އިންތިހާބު އެކުއެކީގައި ބާއްވަން މަޖިލީހުން ފާސްކޮށްފި ނަމަ މިހާރު ހިނގަމުންދާ 20 ވަނަ މަޖިލީހުގެ އުމުރު ޑިސެމްބަރު މަހުގެ ފުރަތަމަ ދުވަހު ހަމަވާނެ އެވެ. މި މަޖިލީހަށް ފަހު އިންތިހާބުކުރާ މަޖިލީސްތަކުގެ ދައުރު ފަށާނީ ވެސް ޑިސެމްބަރު 1 ގަ އެވެ.
މިގޮތަށް ގާނޫނުއަސާސީ ބަދަލުކޮށް، ދެ އިންތިހާބު އެކުއެކީގައި ބޭއްވުމުން މަދުވެގެން 120 މިލިއަން ރުފިޔާ ސަލާމަތްކުރެވޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މީގެކުރިން ވިދާޅުވެފަ އެވެ.
