މި ދުވަސްވަރު މުދާ ބޭލުމުގައި ކޮންމެވެސް ވަރެއްގެ ދަތިކަމެއް ކުރިމަތިވެފަ އޮތަސް، ވީހާވެސް އަވަހަށް މުދާ ބޭލުމުގެ އިންތިޒާމްތައް ހަމަޖައްސާނެކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)އިން ބުނެފި އެވެ.

އެމްޕީއެލްއިން ބުނި ގޮތުގައި، ރޯދަ މަހާ ދިމާކޮށް މާލޭ ވިޔަފާރި ބަނދަރަށް އެއް ފަހަރާ ގިނަ އަދަދެއްގެ މުދާ އުފުލާ ބޯޓު ފަހަރު ވަނީ ކޯލްކޮށްފަ އެވެ. އަދި މާލޭ ވިޔަފާރި ބަނދަރުގެ ޖާގައިގެ ދަތިކަމާއެކު، މުދާ ބޭލުމުގައި ކޮންމެވެސް ވަރެއްގެ ދަތިކަމެއް ކުރިމަތިވެފަވާ ކަމަށް ބުންޏެވެ. އެގޮތުން، މި އުޅަނދު ފަހަރުން މާލޭ ވިޔަފާރި ބަނދަރަށް ބާލަން ޖުމްލަ 3،901 ޓީ.އީ.ޔޫ ހުރިއިރު، ލޯޑްކުރުމަށް ހުރީ ޖުމްލަ 2،700 ޓީ.އީ.ޔޫ ކަމަށް އެމްޕީއެލް އިން ބުންޏެވެ.

އެހެންނަމަވެސް، މުދާ ބޭލުމުގައި އުފެދިފައިވާ ބެކްލޮގް ފިލުވުމަށް އެމްޕީއެލްގެ އޮޕަރޭޝަންސްގެ ޓީމުތަކުން ކުރި ބުރަ މަސައްކަތުން، މިއަދުގެ 12:00 އާ ހަމައަށް ނުބޭލި ހުރީ ހަމައެކަނި 1،250 ޓީ.އީ.ޔޫ ކަމަށާއި ލޯޑްކުރަން ހުރީ 1،118 ޓީ.އީ.ޔޫ ކަމަށް އެމްޕީއެލްއިން ބުންޏެވެ. އަދި އެމްޕީއެލްގެ މާލޭ ސަރަހައްދުގެ ކޮންޓެއިނަރު ޓާމިނަލްތަކުގެ ޖުމްލަ ކެޕޭސިޓީ އަކީ 2،750 ޓީ.އީ.ޔޫ ކަމަށާއި، މި ވަގުތުވެސް އެމްޕީއެލްގެ ޓާމިނަލްތަކުގައި ޖުމްލަ 5،338 ޓީ.އީ.ޔޫ ހުރިކަމަށް ބުންޏެވެ.

އެމްޕީއެލްއިން ވަނީ ޖާގައިގެ ދަތިކަމާ ގުޅިގެން، މުދާ ބޭލުމުގައި ދިމާވާ ދަތިތަކާއެކުވެސް، ވިޔަފާރިވެރިންނާއި ޝިޕިން އޭޖެންޓުންނާއި ކްލިއަރިން އޭޖެންޓުންގެ ފަރާތުން ލިބެމުންދާ އެއްބާރުލުމަށް ޝުކުރު އަދާކޮށްފަ އެވެ.