ދިރާސީ އާ އަހަރުގެ ކިޔެވުން ރާއްޖޭގައި ކިޔަވައިދޭ ހުރިހާ ސްކޫލެއްގައި މިއަދު ފަށައިފި އެވެ.

މި އަހަރުގެ ދިރާސީ އަހަރުގެ ކިޔެވުން 219 ސްކޫލެއްގައި ފަށާފައި ވަނީ 77،000 އަށްވުރެ ގިނަ ދަރިވަރުންނާއި 9،000 އަށްވުރެ ގިނަ ޓީޗަރުންނާއެކުގަ އެވެ. މި އަހަރު ސަރުކާރު ސްކޫލްތަކުގައި ގްރޭޑް އެކެއްގައި ކިޔަވަން 4،000 އަށްވުރެ ގިނަ ދަރިވަރުން ބަދަލުވިއިރު، އޭގެ ތެރޭގައި މާލެ ސަރަހައްދުން ގްރޭޑް އެކެއްގައި ކިޔަވާނެ 1،700 އަށް ގިނަ ދަރިވަރުން ހިމެނެ އެވެ.

އެކަޑަމިކް ކަލަންޑަރުގައިވާ ގޮތުން، މިއަދު ފެށުނު ދިރާސީ އަހަރުގެ ފުރަތަމަ ޓާމުގެ މިޑް ބްރޭކް ދަރިވަރުންނަށް ލިބޭނީ މެއި މަހުގެ 24 ވަނަ ދުވަހުން 30 ވަނަ ދުވަހުގެ ނިޔަލަށެވެ. އަދި ފުރަތަމަ ޓާމުގެ ކިޔެވުން ނިންމައި ދަރިވަރުން ޗުއްޓީއަށް ދާނީ ޖުލައި މަހުގެ 17 ވަނަ ދުވަހުން އޮގަސްޓް މަހުގެ އެއްވަނަ ދުވަހުގެ ނިޔަލަށެވެ.

ދެވަނަ ޓާމުގެ ކިޔެވުން ފެށޭނީ އޮގަސްޓް މަހުގެ ދެވަނަ ދުވަހު ކަމަށާއި، ދެވަނަ ޓާމުގެ ކިޔެވުން ނިމި ބޮޑު ޗުއްޓީއަށް ދަރިވަރުން ދާނީ ޑިސެމްބަރު މަހުގެ 18 ވަނަ ދުވަހުން 2027 ވަނަ އަހަރުގެ ޖެނުއަރީ މަހުގެ 12 ވަނަ ދުވަހުގެ ނިޔަލަށް ކަމަށް އެކަޑަމިކް ކަލަންޑަރުގައިވެ އެވެ.