ތިލަފުށީގައި އަންނަ ޖެނުއަރީ މަސް ނިމުމުގެ ކުރިން ބީއެމްއެލްގެ އޭޓީއެމެއް ބަހައްޓައިދޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މިފަދައިން ވިދާޅުވީ، ރައްޔިތުން ކަންބޮޑުވާ ކަންތައްތަކާއި ހިއްސާކުރަން ބޭނުންވާ ކަންކަން ސީދާ އަޑު އަހަން ބާއްވާ ސިލްސިލާ ބައްދަލުވުންތަކުގެ ތެރެއިން، ކުދި އަދި މެދުފަންތީގެ ވިޔަފާރިންނާއެކު ރޭ ސޯޝަލް ސެންޓަރުގައި ބޭއްވެވި ބައްދަލުވުމުގައި ވިޔަފާރިވެރިއަކު ހުށަހެޅި ހިޔާލަކަށް ޖަވާބުދެއްވަމުންނެވެ.
ރައީސް ވިދާޅުވީ، ކުރީ ސަރުކާރުން ނަގާފައިވާ ދަރަނިތައް ކުރިޔަށް އޮތް ރޯދަ މަހުގެ ކުރިން ކުންފުނިތަކަށް ދައްކައި ނިންމުމަށް މަސައްކަތް ކުރައްވަމުން ގެންދަވާ ކަމަށާއި ވިޔަފާރިވެރިންނަށް ފަސޭހަކޮށްދިނުމަށްޓަކައި ތިލަފުށީގައި ބީއެމްއެލް އޭޓީއެމެެއް އަންނަ މަސް ނިމުމުގެ ކުރިން ބަހައްޓައިދެއްވާނެ ކަމަށެވެ.
ރޭގެ ބައްދަލުވުމުގައި ރާއްޖޭގެ ވިޔަފާރިވެރިންނަށް ހުރި ގިނަ ގޮންޖެހުންތަކުގެ ވާހަކަ ރައީސްއާ ހިއްސާކޮށްފައިވާއިރު، ރައީސް ދެއްވި ޔަގީންކަމަކީ މި ސަރުކާރުން ވިޔަފާރިތައް ކުރިއަރުވަން ގިނަ މަސައްކަތް ކުރައްވާނެ ކަމަށާއި ވިޔަފާރިވެރިންގެ ކަންބޮޑުވުންތަކަށް ރަނގަޅު ހައްލެއް ހޯދައިދޭނެ ކަމަށެވެ.
