ބޮޑުތަކުރުފާނު މަގު ތަރައްގީކުރުމުގެ މަޝްރޫއުގެ ދެވަނަ ސެގްމެންޓުގެ މަސައްކަތް އަންނަ ރޯދަ މަހުގެ ކުރިން ނިންމުމަށް މަސައްކަތް ކުރައްވާނެ ކަމަށް ކޮންސްޓްރަންޝަން މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެ އެވެ.
144 މިލިއަން ރުފިޔާއަށް ހިންގާ މި މަޝްރޫއުގެ ދަށުން 830 މީޓަރުގެ ސަރަހައްދެއް ތަރައްގީކުރެވޭއިރު، މަގު 4 ލޭނަށް ފުޅާކޮށް، ހިނގާ މީހުންނަށް ވަކި ލޭނެއް ގާއިމުކޮށް ފެން ހިންދާ ނިޒާމެއް ގާއިމުކުރާނެ އެވެ. އެ މަޝްރޫއުގެ ފުރަތަމަ ސެގްމެންޓުގެ މަސައްކަތް ނިންމާލައި ފުލުހުންގެ ޝަހީދު ހުސެއިން އާދަމް ބިލްޑިން އިން ފެށިގެން މަސްމާރުކޭޓާ ހަމަޔަށް ވަނީ އާއްމުންނަށް މިހާރު ހުޅުވާލާފަ އެވެ.
މި މަޝްރޫއުގެ ކުރިއަށް އޮތް ދެވަނަ ސެގްމެންޓްގެ މަސައްކަތްތަކާ ގުޅިގެން 'މިހާރު' ނޫހުގައި މިނިސްޓަރާ ހަވާލާދީ ރިޕޯޓުކޮށްފައިވަނީ މިއަދު އެ މަސައްކަތް ފަށާނެ ކަމަށެވެ. އަދި ރޯދައިގެ ކުރިން އެ ސެގްމެންޓުގެ މަސައްކަތް ނިންމައި އާއްމުކޮށް ހުޅުވާލެވޭނެ ކަމުގެ ޔަގީންކަން ވެސް ދެއްވާފައިވެ އެވެ.
ސެގްމެންޓް 2 އަކީ ލޯކަލް މާރުކޭޓުން ފަށައިގެން ނޯތު ހާބަރާ ހަމައަށް ހިމެނޭ 250 މީޓަރުގެ ސަރަހައްދެވެ.
ރޯދަމަހުގެ ފުރަތަމަ ދުވަހަކީ ކަލަންޑަރުގައިވާ ގޮތުން އަންނަ އަހަރުގެ ފެބްރުއަރީ 18 އެވެ.
