އަންނަ އޭޕްރީލްގައި ބާއްވާ ލޯކަލް ކައުންސިލް އިންތިހާބަށް ކުރިމަތިލުމަށް އެދި ހުށަހަޅަންޖެހޭ ކުށާއި ދަރަނީގެ ރެކޯޑު ސާފުކުރުމުގެ ފުރުސަތު ދުރާލާ ފަހިކޮށްދިނުމަށް އިލެކްޝަންސް ކޮމިޝަން (އީސީ) އިން ނިންމައިފި އެވެ.
އިލެކްޝަންސް ކޮމިޝަނުން މިއަދު ބުނީ 2026 އޭޕްރީލް 4 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިހާބަށް ކުރިމަތިލުމަށް އެދޭ ފަރާތްތަކަށް ފަސޭހަކޮށްދިނުމުގެ ގޮތުން ކުށާއި ދަރަނީގެ ރެކޯޑު ސާފުކުރުމުގެ ފުރުސަތު ދުރާލާ ދިނުމަށް ނިންމާފައިވާ ކަމަށެވެ.
އެގޮތުން މި މަހުގެ 1 އިން ފެށިގެން ސާފުކުރާ ކުށާއި ދަރަނީގެ ރެކޯޑު ބަލައިގަންނާނެ ކަމަށެވެ. އެކަމަކު އެ ފޯމު އީސީއަށް ހުށަހަޅަން ޖެހޭނީ އިންތިހާބަށް ކުރިމަތިލުމަށް އެ ކޮމިޝަނުން އެ އިންތިހާބަށް އިއުލާނުކުރުމުން ނެވެ.
މީގެ ކުރިން ކުށާއި ދަރަނީގެ ރެކޯޑު ސާފުކުރަން ކަމާ ބެހޭ އިދާރަތަކަށް ހުށައަޅަންޖެހޭ ތާރީހު އީސީން ކަނޑައަޅަނީ ކުރިމަތިލުމަށް ހުޅުވާލާ ތާރީހުގެ ފަހުން ނެވެ. އެއް ބަޔަކު އެއްފަހަރާ ހުށަހެޅުމުން އިދާރާތަކަށް ބާރުބޮޑުވެ ދަތިތަކާ ކުރިމަތިވެ އެވެ. ދުރާލާ ރެކޯޑުތައް ސާފުކުރުމުގެ ފުރުސަތު ދީފައިމިވަނީ އެހެންވެ އެވެ.
