ގއ. ވިލިނގިލީގައި ޓޫރިޒަމް ތަރައްގީ ކުރުމަށް 11 ބިން ކުއްޔަށް ދޫކުރަނީ

ގއ. ވިލިނގިލީގެ ފަތުރުވެރިކަން އިތުރަށް ކުރިއެރުވުމަށްޓަކައި، އެރަށުން 11 ބިމެއް ވިޔަފާރި އުސޫލުން ކުއްޔަށް ދޫކުރުމަށް ވިލިނގިލީ ކައުންސިލުން ނިންމައިފިއެވެ.

ސަރުކާރުގެ ގެޒެޓުގައި ޝާއިޢުކޮށްފައިވާ އިޢުލާނުގައިވާ ގޮތުން، މި ބިންތަކުގައި ޓޫރިސްޓު ހޮޓާތަކާއި ގެސްޓްހައުސްތަކުގެ އިތުރުން ފަތުރުވެރިކަމާ ގުޅުންހުރި އެހެނިހެން ވިޔަފާރިތައް ވެސް ތަރައްގީ ކުރެވިދާނެއެވެ.

މި މަޝްރޫޢުގައި ބައިވެރިވާން ބޭނުންވާ ފަރާތްތަކަށް ބިޑު ޑޮކިއުމަންޓް ވިއްކަން ފަށައިފި އެވެ. މި މަހުގެ 11 ވަނަ ދުވަހުގެ މެންދުރު 13:00 އާ ހަމައަށް ބިޑު ޑޮކިއުމަންޓް ވިއްކުން ކުރިއަށްދާނެ އެވެ. ބިޑު ގަންނަން ބޭނުންވާ ފަރާތްތަކުން ކައުންސިލް އިދާރާގެ ޕްރޮކިއުމަންޓް ޔުނިޓަށް އީމެއިލް މެދުވެރިކޮށް އެކަން އަންގަންވާނެއެވެ.

ބިޑު ރަޖިސްޓްރޭޝަން ފޯމު ހުށަހެޅުމުގެ ސުންގަޑިއަކީ އަންނަ މަހުގެ 5 ވަނަ ދުވަހުގެ 13:00 އެވެ. އަދި ބިޑު ހުޅުވުން އޮންނާނީ އަންނަ މަހުގެ 12 ވަނަ ދުވަހުގެ 13:00 ގައެވެ. ބިޑާ ގުޅޭ އެންމެހައި ލިޔެކިޔުންތައް ކައުންސިލް އިދާރާއަށް ސީދާ ގެންގޮސް ނުވަތަ ރަސްމީ އީމެއިލް މެދުވެރިކޮށް ހުށަހެޅިދާނެއެވެ.

މި މަޝްރޫޢަކީ ވިލިނގިލީގެ ފަތުރުވެރިކަން ކުރިއެރުވުމަށް އެޅޭ މުހިންމު ފިޔަވަޅެއްގެ ގޮތުގައި ފާހަގަކުރެވެއެވެ. މި ބިންތައް ތަރައްގީކުރުމުން ރަށުގެ އިޤްތިޞާދަށް ފައިދާތަކެއް ލިބި، ވަޒީފާގެ ފުރުޞަތުތައް އިތުރުވެގެންދާނެ ކަމަށް ބެލެވެއެވެ.