މާލެ އާއި ވިލިމާލޭގެ މަގުތައް އަލުން ހެދުމުގެ މަސައްކަތް އަންނަ އަހަރުގެ ކުރީކޮޅު ފެށޭނެ ކަމަށް ރައީސް ޑރ. މުހައްމަދު މުއިއްޒު ވަނީ އިއުލާން ކުރައްވާފައެވެ. މި މަޝްރޫއަކީ ޗައިނާ ސަރުކާރުގެ ހިލޭ އެހީގެ ދަށުން ކުރިއަށް ގެންދާ މަޝްރޫއެކެވެ.

މި މަޝްރޫއުގެ ދަށުން މާލެ އާއި ވިލިމާލޭގެ ހުރިހާ މަގުތަކެއް ތާރު އަޅައިގެން ރަނގަޅު ފެންވަރަކަށް ހެދޭނެއެވެ. ޖުމްހޫރީ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވި ގޮތުގައި މި މަޝްރޫއު ފުރިހަމަ ކުރުމަށް ގާތްގަނޑަކަށް ހަތަރު އަހަރު ދުވަހުގެ މުއްދަތެއް ނަގާނެއެވެ.

މި މަޝްރޫއުގެ ފުރަތަމަ މަރުހަލާގެ ގޮތުގައި، މަގުތައް ހެދުމުގެ ޑިޒައިން ތައްޔާރުކުރުމުގެ ކުރިން ހަދަންޖެހޭ ސަރވޭގެ މަސައްކަތަށް ޗައިނާގެ ޓީމެއް މިހާރު ވަނީ ރާއްޖެ އައިސްފައެވެ.

މި މަޝްރޫއު ފެށުމުގެ ކުރިން، އަމީނީ މަގު ހަލާކުވެފައިވާ މިންވަރު ވަނީ ގިނަ ފަރާތްތަކެއްގެ ކަންބޮޑުވުން ފާޅުކުރަމުންދާ މައްސަލައަކަށް ވެފައެވެ. 84 މިލިއަން ރުފިޔާ ހޭދަކޮށްގެން އާރުޑީސީއާ ހަވާލުކޮށްގެން ހެދި އަމީނީ މަގުގެ ތާރުގަނޑު މިހާރު ވަނީ އަޑިގުޑަންވެ، ދުއްވާ އެއްޗެއްސަށް ނުރައްކާވާ ހިސާބަށް ގޮސްފައެވެ.

ސިޓީސް، ލޯކަލް ގަވަމެންޓް އެންޑް ޕަބްލިކް ވޯކްސް މިނިސްޓަރު އާދަމް ޝަރީފް ވިދާޅުވި ގޮތުގައި މަގުތައް މަރާމާތުކުރުމަކީ މިނިސްޓްރީގެ މެންޑޭޓުގައި ސީދާ ހިމެނޭ ކަމެއް ނޫނެވެ. އެހެންނަމަވެސް، އަމީނީ މަގު މަރާމާތު ކުރެވޭނެ ކަމަށް އެމަނިކުފާނު ވިދާޅުވިއެވެ.

ޗައިނާގެ އެހީގައި ކުރިއަށްގެންދާ މި އައު މަޝްރޫއަކީ މާލެ އާއި ވިލިމާލޭގެ މަގުތަކުގެ ދެމެހެއްޓެނިވި ހައްލަކަށް ވެގެންދާނެ ކަމަށް ސަރުކާރުން އުއްމީދު ކުރެއެވެ.