ރައްޔިތުންގެ މަޖިލީހުގެ ނައިބު ރައީސްގެ މަގާމުން، ދިއްގަރު ދާއިރާގެ ޕީއެންސީ މެންބަރު އަހުމަދު ނާޒިމް ވަކިކުރުމަށް ހުށަހަޅާ ގަރާރު ރައްޔިތުންގެ މަޖިލީހުގެ އިދާރާއަށް މިއަދު ހުށަހަޅައިފިއެވެ.
މަޖިލީހުގެ އިދާރާއިން މިއަދު ނެރުނު ބަޔާނެއްގައި ބުނީ، މަޖިލީހުގެ ނައިބު ރައީސް އަހުމަދު ނާޒިމް އެ މަގާމުން ވަކިކުރުމުގެ ގަރާރެއް މަޖިލީހުގެ އިދާރާއަށް ލިބިފައިވާ ކަމަށެވެ. އަދި މި މައްސަލަ ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީ އާއި ރައްޔިތުންގެ މަޖިލީހުގެ ގަވާއިދުގައިވާ ގޮތުގެ މަތިން ކުރިއަށްގެންދެވޭނެ ކަމަށްވެސް މަޖިލީހުގެ އިދާރާއިން ބުނެފައިވެއެވެ.
ނާޒިމް މަގާމުން ވަކިކުރުމުގެ މަސައްކަތް ފަށާފައި މިވަނީ، ވެރިކަން ކުރާ ކޮންގްރެސް ޕާޓީ (ޕީއެންސީ) ގެ އިތުބާރު އޭނާއަށް ގެއްލިފައިވާ ކަމަށް އެ ޕާޓީގެ ޕާލަމެންޓަރީ ގްރޫޕުގެ ލީޑަރު، އިނގުރައިދޫ ދާއިރާގެ މެންބަރު އިބްރާހީމް ފަލާހު ވިދާޅުވެފައިވާ ދަނޑިވަޅެއްގައެވެ. ފަލާހު މީޑިއާތަކަށް މައުލޫމާތު ދެއްވަމުން ވިދާޅުވީ، ނާޒިމްގެ މައްޗަށް ޕާޓީގެ އިތުބާރު މިހާރު ނެތް ކަމަށާއި، އޭނާ މަގާމުން ވަކިކުރުމަށް ބޭނުންވާ މެންބަރުންގެ ސޮއި މިހާރު ހަމަކޮށްފައިވާ ކަމަށެވެ.
ރައްޔިތުންގެ މަޖިލީހުގެ ގަވާއިދު ބުނާގޮތުން، މަޖިލީހުގެ ނައިބު ރައީސް މަގާމުން ވަކިވާނީ ދެ ހާލަތެއްގައެވެ. އެއީ އެ މެންބަރަކު މެންބަރުކަމުން ވަކިވުމުން ނުވަތަ މަޖިލީހުގެ ނައިބު ރައީސްކަމުގެ މަގާމުން އެ މީހަކު ވަކިކުރުމަށް ރައްޔިތުންގެ މަޖިލީހުން ފާސްކުރުމުންނެވެ.
މަޖިލީހުގެ ރައީސް އަބްދުއްރަހީމް އަބްދުﷲ އާއި ނައިބު ރައީސް އަހުމަދު ނާޒިމަކީ 20 ވަނަ ރައްޔިތުންގެ މަޖިލީހުގެ މަސައްކަތް ފެށުނުއިރު އެ މަގާމުތަކަށް އިންތިހާބުކުރެވުނު ދެ ބޭފުޅުންނެވެ. ނަމަވެސް ސަރުކާރު ހިންގާ ޕާޓީގެ ތެރޭގައި އުފެދުނު ބައެއް ހިޔާލުތަފާތުވުންތަކާ ގުޅިގެން ނާޒިމް މަގާމުން ވަކިކުރުމުގެ މަސައްކަތް މިހާރު މިވަނީ ރަސްމީކޮށް ފެށިފައެވެ.
