ރޯދަ ހަދިޔާގެ ގޮތުގައި މާލޭ ސަރަޙައްދުގައި 53,000 އަށްވުރެ ގިނަ މަސްދަޅު ކޭސް ދޫކޮށްފައިވާކަމަށް ލޯކަލް ގަވަމެންޓް މިނިސްޓްރީއިން މައުލޫމާތުދީފި އެވެ.
މާލެ ސަރަހައްދުގައި މަސްދަޅު ކޭސް ބަހަން ފަށާފައި ވަނީ މިދިޔަ މަހުގެ 24 ވީ ހޮނިހިރު ދުވަހު އެވެ. އެގޮތުން މަސްދަޅު ކޭސް ދޫކުރުމުގެ މަސައްކަތް ރޭ ނިންމާލާފައިވާއިރު، ރޭގެ ނިޔަލަށް މާލެ، ވިލިމާލެ އަދި ހުޅުމާލޭގެ ގޭބިސީތަކަށް 53،308 މަސްދަޅު ކޭސް ދޫކޮށްފައިވާކަމަށް ލޯކަލް ގަވަމެންޓް މިނިސްޓްރީން ބުންޏެވެ.
މީގެއިތުރުން މިނިސްޓްރީއިން ބުނީ، އެއްވެސް ސަބަބަކާހުރެ މަސްދަޅު ކޭހާއި ހަވާލުނުވާ ފަރާތްތަކަށް ދެން މަސްދަޅު ކޭސް ލިބޭނީ ރޭގަނޑު 8.30 އިން 11.00 އަށް މިފްކޯ މަސް ފިހާރައިން ކަމަށެވެ. އަދި މިފްކޯ މަސް ފިހާރައިން މަސްދަޅު ކޭސްތައް ދޫކުރަނީ މުލަ ރޯދަ ދުވަހާ ހަމަޔަށް ކަމަށްވެސް މިނިސްޓްރީން ބުންޏެވެ.
ރައީސް ޑރ. މުހައްމަދު މުއިއްޒުގެ ނިންމެވުމުގެ ދަށުން މިދިޔަ އަހަރުގެ ރޯދަ މަހު ވެސް ވަނީ ކޮންމެ ގޭބިސީއަކަށް މަސްދަޅު ކޭހެއް ސަރުކާރުން ހަދިޔާކޮށްފަ އެވެ.
