ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ޖާމަން ކައުންސިލް އޮން ފޮރިން ރިލޭޝަންސް، ޑޮއިޝް ގެޒޭލްޝާފްޓް ފުއާ އައުސްވެއާޓީގަ ޕޮލިޓީކް (ޑީޖީއޭޕީ) އަށް ޒިޔާރަތްކުރައްވައިފި އެވެ.
މި ޒިޔާރަތުގައި އެމަނިކުފާނު ވަނީ، ކަނޑުތައް ބެލެހެއްޓުމާ ބެހޭގޮތުން ރާއްޖެއިން ގެންގުޅޭ ވިސްނުން ބަޔާންކޮށްދެއްވައި، ހާރިޖީ ސިޔާސަތުގައި ކަނޑުތައް އަދާކުރާ ދައުރާ ބެހޭގޮތުން ތަގުރީރެއްދެއްވާފަ އެވެ. އަދި މޫސުމީ ތަންޒީމާއި ހަޔަވީ ސިންދަފާތާއި ދުނިޔޭގެ ކާބޯތަކެތީގެ ރައްކާތެރިކަން ގާއިމުކުރުމުގައި ކަނޑުތަކުން އަދާކުރާ ދައުރުގެ މުހިންމު ކަންވެސް ރައީސް ވަނީ ފާހަގަކުރައްވާފަ އެވެ.
ނަމަވެސް، އިސްތިރާޖީ އަދި ހާރިޖީ ފިކުރުގައި، އެކަށީގެންވާ މިންވަރަކަށް ކަނޑުތައް ތަމްސީލުކުރެވިފައިނުވާކަން ފާހަގަކުރައްވަމުން އެމަނިކުފާނު ވިދާޅުވީ، ރާއްޖެ އާއި ކަނޑާ ލާމެހިފައިވާ މިންވަރެވެ. އެގޮތުން މޫސުމަށް އަންނަ ބަދަލުތަކުގެ ސަބަބުން، ރާއްޖޭގެ އިގްތިސާދަށާއި ދިވެހިންގެ ދިރިއުޅުމުގެ ވައްޓަފާޅިއަށް ކޮށްފާނޭ ބޮޑެތި އަސަރުތަކުގެ މައްޗަށް، އެމަނިކުފާނު އަލިއަޅުއްވާލެއްވި އެވެ.
އެމަނިކުފާނުގެ ތަޤުރީރު ނިންމަވާލައްވާފައިވަނީ، ކަނޑުތަކުގެ މައްޗަށް ބިނާކުރެވޭ ހާރިޖީ ސިޔާސަތަކީ، ދިވެހިރާއްޖެއަށް ވުޖޫދީ، އަދި ބައިނަލްއަގްވާމީ މުޖުތަމައަށް އަސާސީ ކަމެއް ކަމަށް ވިދާޅުވަމުންނެވެ. އަދި ދުނިޔޭގެ ކަނޑުތަކަކީ، އެއްބާރުލުންދިނުމަށް ޖާގަ އޮންނަ ތަނެއްކަން ކަށަވަރުކުރުމަށްޓަކައި، ޖަރުމަނުވިލާތާއި، އެނޫންވެސް، މި ވިސްނުން ހިއްސާކުރާ ބައިވެރިންނާއެކު މަސައްކަތްކުރަން ރާއްޖެ އޮތީ ތައްޔާރަށްކަމަށް އެމަނިކުފާނު ވިދާޅުވި އެވެ.
