ދިވެހިރާއްޖޭގެ އުތުރާއި މެދުތެރޭގެ އަތޮޅުތަކުގެ ވައި ނުސާފުވެ، ދުރު ފެންނަ މިންވަރު ބޮޑުތަނުން ދަށްވެފައިވާތީ، ރައްކާތެރިކަމުގެ ފިޔަވަޅުތައް އެޅުމަށް މެޓް އިން އިލްތިމާސްކޮށްފި އެވެ.

މެޓް އޮފީހުން ގޮތުގައި، ރާއްޖޭގެ އުތުރާއި މެދުރާއްޖެތެރޭގެ ސަރަހައްދުތަކަށް މިހާރު ދަނީ ދުންފުނީގެ އަސަރު ވަރަށް ބޮޑަށް ކުރަމުންނެވެ. ތަފާސްހިސާބުތަކަށް ބަލާއިރު، ދުރު ފެންނަ މިންވަރު މިހާރު ވަނީ ތިން ކިލޯމީޓަރަށްވުރެ ދަށްވެފަ އެވެ. އަދި ކުރިއަށް އޮތް ހަތަރު ދުވަހުވެސް އިރުއުތުރުން ޖެހޭ ވަޔާއެކު، ރާއްޖޭގެ ސަރަހައްދުގައި ދުންފުނީގެ އަސަރު ދެމިއޮންނާނެ ކަމަށް އެ އިދާރާއިން ލަފާކުރެ އެވެ.

ވައިގެ ފެންވަރު ބަލާ "އައިކިއު އެއާ" ގެ މައުލޫމާތުތަކަށް ބަލާއިރު، މާލެ ސަރަހައްދުގެ ވައިގެ ނުސާފުކަން (US AQI) މިހާރު ހުރީ 119 ގައެވެ. އަދި ކުޅުދުއްފުށި ސިޓީގައި މި އަދަދު ހުރީ 112ގަ އެވެ. މިއީ ސިއްހީ ގޮތުން ބަލާއިރު ނާޒުކު ފަރާތްތަކަށް ނުރައްކާ އޮތްކަން އަންގައިދޭ "އޮރެންޖު" އެލާޓުގެ ދަރަޖައެކެވެ.

މެޓް އޮފީހުން ވަނީ ބޭރުގައި އުޅޭ ފަރާތްތަކާއި، ހާއްސަކޮށް ކަނޑުދަތުރުފަތުރު ކުރާ ފަރާތްތަކުން މި ހާލަތަށް ބަލައިގެން ރައްކާތެރިކަމުގެ ފިޔަވަޅުތައް އެޅުމަށް އިރުޝާދު ދީފަ އެވެ. ވައި ނުސާފުވުމުގެ ސަބަބުން، ހާއްސަކޮށް ނޭވާލާ ނިޒާމުގެ މައްސަލަތައް ހުންނަ ފަރާތްތަކަށާއި، ކުޑަކުދިންނާއި އުމުރުން ދުވަސްވީ މީހުންނަށް ސިއްހީ ގޮތުން ނޭދެވޭ އަސަރުތަކެއް ކޮށްފާނެތީ، އެކަމަށް ހާއްސަ ސަމާލުކަމެއް ދިނުމަށް އެޗްޕީއޭއިން ތަކުރާރުކޮށް އިލްތިމާސްކުރެ އެވެ.