ޗައިނާ ހޮންގްކޮންގްގެ ގްރޭޓާ ބޭ އެއާލައިންސް އިން ރާއްޖެއަށް ޗާޓަރު ދަތުރުތައް ފަށައިފި އެވެ.
މި ދަތުރުތައް ފަށާފައިވަނީ އިއްޔެއެވެ. އެއާއިއެކު، މި އެއާލައިންގެ ފުރަތަމަ ފްލައިޓަށް ވެލާނާ އިންޓާނޭޝަނަލް އެއާޕޯޓުން ވަނީ ހޫނު މަރުޙަބާއެއް ކިޔާފަ އެވެ. އަދި މި ދަތުރުތައް މިމަހުގެ 25 ވަނަ ދުވަހުގެ ނިޔަލަށް ކުރިއަށް ގެންދިޔުމަށްވެސް ވަނީ ހަމަޖެހިފަ އެވެ.
އެގޮތުން، ރާއްޖެއަށް އައި ފުރަތަމަ މަތިންދާބޯޓު، އެޗްބީ2500 އަށް ވަނީ ވޯޓާ ސެލިއުޓެއް އަރުވައިފަ އެވެ. އަދި އެ އެއާލައިނުން ރާއްޖެ އައި 174 ފަސިންޖަރުންނަށް ވަނީ ހޫނު މަރުހަބާއެއްވެސް ކިޔައިފަ އެވެ. ގްރޭޓާ ބޭ އެއާލައިންސްގެ ޗާޓަރު ދަތުރުތައް ކުރުމަށް ހަމަޖެހިފައިވަނީ ހޮންގްކޮންގް އިން ސީދާ މާލެއަށް,، ކޮންމެ ދުވަހަކު އެއް ދަތުރެވެ. މި ދަތުރުތަކުގައި ބޭނުންކުރުމަށް ހަމަޖެހިފައިވަނީ ބޮއިންގް 737 މެކްސްގެ ފްލައިޓެކެވެ.
ގްރޭޓާ ބޭ އެއާލައިންސްއަކީ ހޮންގްކޮންގް އިން ސީދާ މާލެއަށް ދަތުރުތައް ފެށި ދެވަނަ އެއާލައިނެވެ.
