ސަރުކާރުގެ މަސައްކަތްތަކުގެ އެންމެ ފަހުގެ މައުލޫމާތުތައް ހާމަކުރުމަށްޓަކައި، ކޮންމެ ހަފުތާއެއްގެ ހޯމަ ދުވަހު ނޫސްވެރިންނާ ބައްދަލުކުރެއްވުމަށް ނިންމަވާފައިވާކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާނު ކުރައްވައިފި އެވެ.
މި އަހަރުގެ ރައްޔިތުންގެ މަޖިލީހުގެ މަސައްކަތް ފެށުމަށް ބޭއްވި ޖަލްސާގައި 2026 ވަނަ އަހަރުގެ ރިޔާސީ ބަޔާން އިއްވަވަމުން ރައީސް ވިދާޅުވީ، މަލޫމާތު ފޯރުކޮށްދިނުމުގައި މި ސަރުކާރުން މީޑިއާއާ ގާތް ގުޅުމެއް ބާއްވާނެ ކަމަށެވެ.
އެގޮތުން، ވޭތުވެދިޔަ އަހަރުގެ ތަފާސްހިސާބުތަކަށް އަލިއަޅުއްވާލައްވަމުން ރައީސް ފާހަގަކުރެއްވި ގޮތުގައި، ސަރުކާރުގެ ހަރަކާތްތަކާ ގުޅޭ މައުލޫމާތު ދެއްވުމަށް މިނިސްޓަރުން ވަނީ ރާއްޖެއާއި ބޭރުގެ މީޑިއާތަކަށް 424 ފަހަރު އިންޓަވިއު ދެއްވާފަ އެވެ. އަދި މިނިސްޓްރީތަކުގެ އިސްވެރިން 493 ފަހަރަކު މީޑިއާ މެދުވެރިކޮށް ރައްޔިތުންނަށް މުހިއްމު މައުލޫމާތުތައް ހިއްސާކުރައްވާފައިވާކަން ވެސް އެމަނިކުފާނު ފާހަގަކުރެއްވި އެވެ.
މީގެއިތުރުން، އާރުޓީއައި ހުށަހެޅުންތަކާ ގުޅޭގޮތުން ވާހަކަފުޅުދައްކަވަމުން ރައީސް ވިދާޅުވީ، މިދިޔަ އަހަރު ރައީސް އޮފީހަށާއި ވުޒާރާތަކަށް ހުށަހެޅުނު 1,341 އާރުޓީއައިގެ ތެރެއިން 1,251 ހުށަހެޅުމަކަށް ޖަވާބު ދީފައިވާނެ ކަމަށެވެ. މިއީ ހުށަހެޅުނު ފޯމުތަކުގެ 93 އިންސައްތަކަން ފާހަގަކުރައްވައި، އެކި ސަބަބުތަކާ ހުރެ މުއްދަތު އިތުރުކުރަން ޖެހިފައިވާ ފޯމުތަކަށް ވެސް ޖަވާބު ދިނުމުގެ މަސައްކަތް ކުރިއަށްދާކަމަށް އެމަނިކުފާނު ވިދާޅުވި އެވެ. އަދި، ސަރުކާރުގެ އެކި މަޝްރޫއުތަކާއި ކަންކަމުގެ މައުލޫމާތު ފެތުރުމަށްޓަކައި، ވޭތުވެދިޔަ އަހަރުގެ ތެރޭގައި ސޯޝަލް މީޑިއާގެ އެކި މަންސަތަކުގައި 40,875 ޕޯސްޓު ޝާއިއުކޮށްފައިވާނެ ކަމަށް ވެސް ރައީސް ވިދާޅުވިއެވެ.
