ގިރާވަރުފަޅުގެ ލޭންޑް ޔޫސް ޕްލޭނަށް ބަދަލުތަކެއް ގެނެސްފައިވާތީ އެތަނުން ގޯތި ލިބުނު މީހުންގެ ބިމުގެ ސަރަހައްދުތައް ކަނޑައެޅުމަށް ގުރު ނެގުން ނިންމާލައިފި އެވެ.
ހައުސިން މިނިސްޓްރީން މިގޮތަށް ނިންމާފައި ވަނީ ކުރީގެ ލޭންޑް ޔޫސް ޕްލޭންގައި 610 ގޯތި މަދުވާތީ، އެ އަދަދު ހިމަނައިގެން ޖުމްލަ 4072 ގޯތި ހިމެނޭހެން އައު ޕްލޭނެއް އެކުލަވާލުމާ ގުޅިގެންނެވެ. މި ގުރުއަތުލުން ކުރިއަށްގެންގޮސްފައި ވަނީ، އިއްޔެ ހެނދުނު 09:30 އިން ފެށިގެން ސޯޝަލް ސެންޓަރުގެ ހޯލުގަ އެވެ.
ގިރާވަރުފަޅުން ދޫކުރާ ގޯތީގެ އަދަދާއި ބޮޑުމިނުގެ ތަފްސީލް:
- 1250 އަކަފޫޓުގެ 2603 ގޯތި
- 1650 އަކަފޫޓުގެ 1214 ގޯތި
- 2050 އަކަފޫޓުގެ 254 ގޯތި
- 2450 އަކަފޫޓުގެ 01 ގޯތި
ހައުސިން މިނިސްޓްރީއިން ބުނި ގޮތުގައި ގޯތިތަކުގެ ރަޖިސްޓްރީއާއި އެއްބަސްވުންތަކާ ގުޅޭ މައުލޫމާތު ކުރިއަށް އޮތް ތަނުގައި ހިއްސާކުރާނެ އެވެ. އަދި ބިން ހިއްކުމުގެ މަސައްކަތް ނިމުމާއެކު، ގޯތި ލިބުނު ފަރާތްތަކާ ބިން ހަވާލުކުރުމުގެ މަސައްކަތް ފަށާނެ ކަމަށްވެސް މިނިސްޓްރީއިން ވަނީ ވިދާޅުވެފަ އެވެ.
