ރައްޔިތުންނަށް ވީ ވައުދުތައް ފުއްދޭނީ، ކުރިއަށް އޮތް ލޯކަލް ކައުންސިލް އިންތިހާބުގައި ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ކެންޑިޑޭޓުން ހޮވައިގެން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސުލްޖުމްހޫރިއްޔާ މިފަދައިން ވިދާޅުވީ، ސަރުކާރު ހިންގާ މައި ޕާޓީ، ޕީއެންސީގެ އޮފީސް ހުޅުވުމަށް މިރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ. އެމަނިކުފާނު ވިދާޅުވި ގޮތުގައި، ރަށު ފެންވަރާއި ސިޓީ ފެންވަރުގައި ސަރުކާރުގެ ސިޔާސަތުތައް ތަންފީޒުކޮށް، ވައުދުތައް ފުއްދުމުގައި އެންމެ ފުރިހަމަ އެއްބާރުލުމެއް ލިބިގެންދާނީ އެ ޕާޓީގެ ކެންޑިޑޭޓުންގެ ފަރާތުންނެވެ.

"ރަށު ފެންވަރުގައި، ސިޓީ ފެންވަރުގައި ފުރިހަމަ އެއްބާރުލުން ދެއްވާނެ ބޭފުޅުން ހޮވާދެއްވާ، އެކަން ކޮށްދެއްވާނީ، އަޅުގަންޑަށް އެންމެ ފުރިހަމަ އިތުބާރު އޮތީ ޕީއެންސީ މެމްބަރުންނަށް" ރައީސް ވިދާޅުވި އެވެ.

މިކަން ފާހަގަކުރައްވަމުން ރައީސް ވަނީ އަންނަ އޭޕްރިލް 4 ގައި ބާއްވާ އިންތިހާބުގައި ޕީއެންސީގެ ކެންޑިޑޭޓުން ހޮވުމަށް ރައްޔިތުންގެ ކިބައިން އިލްތިމާސްކުރައްވާފަ އެވެ.

ސަރުކާރުގެ ތަރައްގީގެ މަޝްރޫއުތައް މިހާރުވެސް އެކި ދާއިރާތަކުން ބާރު ދުވެލީގައި ކުރިއަށްދާކަން ފާހަގަކުރައްޗަމުން ރައީސް ވަނީ މި އަހަރު އަލަށް ފެށުމަށް ހަމަޖެހިފައިވާ މުހިންމު މަސައްކަތްތަކާއި މުސްތަގުބަލަށް ރާވާފައިވާ ކަންކަމަށް އެއްބާރުލުން ލިބޭނީ ޕީއެންސީގެ ކެންޑިޑޭޓުން އިންތިހާބުވެގެން ކަމަށް ވިދާޅުވި އެވެ. އަދި އެމަނިކުފާނުގެ އެންމެ ބޮޑު އިތުބާރެއް އޮތީވެސް އެ ޕާޓީގެ މެންބަރުންނަށް ކަމުގައި ވިދާޅުވި އެވެ.