އަންނަ އޭޕްރީލް މަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި ވޯޓުލުމުގެ ހައްގު 294,937 މީހަކަށް ލިބޭ ކަމަށް އިލެކްޝަންސް ކޮމިޝަނުން ބުނެފި އެވެ.

އެ ކޮމިޝަނުން ބުނި ގޮތުގައި، އޭޕްރީލް 4 ވަނަ ދުވަހު ބާއްވާ މި އިންތިހާބުގައި ޖުމްލަ 294,937 މީހަކަށް ވޯޓުލުމުގެ ޝަރުތު ހަމަވެއެވެ. މީގެ ތެރޭގައި ހިމެނެނީ 150,410 ފިރިހެނުންނާއި 144,527 އަންހެނުންނެވެ.

ވޯޓުލުމުގެ ހައްގު ލިބިފައިވާ މީހުންގެ ލިސްޓަށް ޝަކުވާ ހުށަހެޅުމުގެ ފުރުސަތުވެސް މިހާރު ވަނީ ހުޅުވާލާފަ އެވެ. އެގޮތުން، ޝަކުވާ ހުށަހަޅަން ބޭނުންވާ ފަރާތްތަކުން މި މަހުގެ 18 ވަނަ ދުވަހުގެ މެންދުރުފަހު 3:00 ގެ ކުރިން މައިޕޯޓަލް (my.elections.gov.mv) މެދުވެރިކޮށް ޝަކުވާ ހުށަހެޅޭނެ އެވެ. އަދި ސިޔާސީ ޕާޓީތަކުން ޝަކުވާ ހުށަހަޅަންޖެހޭނީ އެ ފަރާތްތަކަށް ހާއްސަކުރެވިފައިވާ "ސިމެދަ ޕޯޓަލް" މެދުވެރިކޮށް ކަމަށްވެސް އީސީން ބުނެފައިވެ އެވެ.

ވޯޓާސް ރަޖިސްޓަރީގައި ހިމެނޭ މައުލޫމާތުތައް ސަރުކާރުގެ ގެޒެޓާއި އިލެކްޝަންސް ކޮމިޝަނުގެ ވެބްސައިޓުން މިހާރު ފެންނަން ހުންނާނެ އެވެ. މީގެއިތުރުން، (VR [space] IDNO) ޖެއްސެވުމަށްފަހު 1414 އަށް އެސް.އެމް.އެސް ކޮށްގެންވެސް ލިސްޓުގައިވާ މައުލޫމާތު ޗެކްކުރެވޭނެ އިންތިޒާމުވެސް ވަނީ ހަމަޖައްސާފަ އެވެ.