ގިރާވަރު ފަޅުން ދޫކުރި ގޯތީގެ ތެރެއިން 1،114 ގޯތި ގުޅިފަޅަށް ބަދަލުކުރަން ނިންމާފައިވާ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެ އެވެ.
މިނިސްޓަރު މިފަދައިން ވިދާޅުވީ، ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި އެވެ.
މިނިސްޓަރު ވިދާޅުވި ގޮތުގައި، ކުރީ ސަރުކާރުން ގިރާވަރު ފަޅުން 5،186 ގޯތި ދޭން ނިންމާފައި އޮތް ނަމަވެސް، އެ ތަނުގައި އެންމެ އެކަށީގެންވާ ވަރަށް ދިރިއުޅުމުގެ މާހައުލު ގާއިމުވެފައި އޮތް ކަމަށް ގަބޫލު ނުކުރެވޭތީ، ގިރާވަރުފަޅުން ލިބުނު 1،114 ގޯތި ގުޅީފަޅަށް ބަދަލުކުރާނެ ކަމަށެވެ.
"އާދެ ކުރީ ސަރުކާރުން ދޭން ކަނޑައަޅާފައިވާ ގޯތީގެ އަދަދަކީ 5186، އެއީ 170 ހެކްޓަރު، އެހެންވެ އެ ތަނަކީ އެންމެ އެކަށީގެންވާ ދިރިއުޅުމުގެ މާހައުލު ނެތް ތަނަކަށް ވުމުން، އެތަނުން 1،114 ގޯތި ގުޅީފަޅަށް ބަދަލުކޮށް ބާކީ ހުރި 4،072 ގޯތި އެތަނުން ނަގާ، ލޭންޑް ޔޫސް ޕްލޭން ބަދަލުކޮށް މިހާރުވަނީ ގެޒެޓު ކުރުމުގެ މަރުހަލާގައި" މިނިސްޓަރު ވިދާޅުވި އެވެ.
ގިރާވަރުފަޅު ހިއްކުމުގެ މަސައްކަތް އަންނަ މަސް ނިމުމުގެ ކުރިން ފެށޭނެކަން ފާހަގަ ކުރައްވާ، އެ ތަނުން ގޯތި ލިބުނު ފަރާތްތަކުގެ މެދުގައި އަންނަ މަހު ގުރުއަތު ނެގުން އޮންނާނެ ކަމަށް މިނިސްޓަރު ވިދާޅުވި އެވެ. އަދި، ބިން ހިއްކާ ނިމެމުންދާ ވަރަކަށް ގޯތީގެ ރަޖިސްޓަރީ ހަވާލުކުރުމުގެ މަސައްކަތް ކުރިއަށްދާނެ ކަމަށްވެސް މިނިސްޓަރު ވަނީ ވިދާޅުވެފަ އެވެ.
ކުރީ ސަރުކާރުން ނިންމީ ގިރާވަރު ފަޅުން 160 ހެކްޓަރުގެ ބިން ހިއްކާށެވެ. އޭރު މަސައްކަތް ފަށައިގެން ގޮސް 50 ހެކްޓަރުގެ ބިން ހިއްކާފައި ފަހުން މަސައްކަތް އޮތީ މެދުކެންޑިފަ އެވެ. އެކަމަކު އެ މަސައްކަތް އަލުން ފަށައި 2-3 މަސް ތެރޭގައި ނިމޭނެ ކަމަށް ރައީސް ޑރ. މުހައްމަދު މުއިއްޒު ވަނީ ވިދާޅުވެފަ އެވެ.
