މާލޭގެ ގެސްޓް ހައުސްއަކާއި އެޕާޓްމަންޓެއް ބަލައިފާސްކޮށް މަސްތުވާތަކެއްޗާއެކު ހަތަރު މީހަކު ހައްޔަރުކޮށްފައިވާކަމަށް ދިވެހި ފުލުހުންގެ ހިދުމަތުން ބުނެފި އެވެ.

ފުލުހުން ބުނި ގޮތުގައި، މި މައްސަލާގައި ހައްޔަރުކޮށްފައި ވަނީ ދަފްތަރު ނަންބަރު ރސ. 10367 / މާލެ، އުމުރުން 22 އަހަރުގެ ޙަސަން އަނަސް އާއި އަތަގަސްދޮށުގެ / ދޫޑިގަން ޏ.ފުވައްމުލަކު، އުމުރުން 22 އަހަރުގެ މޫސާ ޝަހީމް އާއި އާވެލި / ބ. ގޮއިދޫ، އުމުރުން 25 އަހަރުގެ ޙުސައިން ޝަރުވާން އަދި ނޭޕާލް ރައްޔިތެއްކަމަށްވާ އުމުރުން 21 އަހަރުގެ ނިޝާ ރާއި އެވެ.

ފުލުހުން ހިންގި މިއޮޕަރޭޝަނުގައި ބަލައިފާސްކުރި ތަންތަނުން މަސްތުވާތަކެތި ފެނިފައިވާއިރު، އެތަކެތީގެ ބަރުދަނުގައި 377.39 ގްރާމް ހުރި ކަމަށް ފުލުހުން ބުންޏެވެ. މި މައްސަލާގައި ހައްޔަރުކޮށްފައިވާ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ހަސަން އަނަސް އަށް 15 ދުވަހުގެ މުއްދަތެއް ދީފައިވާއިރު މޫސާ ޝަހީމް އާއި ހުސައިން ޝަރުވާން އަށް 5 ދުވަހުގެ މުއްދަތެއް ދީފައިވެ އެވެ. އަދި ނިޝާ ރާއި އަށްވަނީ އެއް ދުވަހުގެ މުއްދަތެއް ދީފައި އެވެ.

މިމައްސަލަ ޑްރަގް އެންފޯސްމަންޓުން ދަނީ އިތުރަށް ތަހުގީގު ކުރަމުންނެވެ.