މާލޭ ސަރަހައްދުގައި ދިމާވެފައިވާ ޕާކު ކުރުމުގެ ދަތިކަމަށް ވަގުތީ ހައްލެއް ހޯދައިދިނުމުގެ ގޮތުން، ހުޅުމާލޭގައި ޕާކިން ސަރަހައްދުތަކެއް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ކަނޑައަޅައިފިއެވެ.
އެޗްޑީސީން ބުނީ، އެކުންފުންޏާއި ރާންސްޕޯޓް މިނިސްޓްރީ ގުޅިގެން ކުރިއަށްގެންދާ މި މަސައްކަތުގެ ތެރެއިން ޕަކުކުރަން ކަނޑައަޅާފައިވާ ސަރަހައްދުގައި ހަތަރު ފުރޮޅުލީ 1964 ވެހިކަލް ޕާކު ކުރެވޭނެ ޖާގަ ހަމަޖެހިފައިވާ ކަމަށެވެ. އެއީ:
- މަސްޖިދުލް ވާލިދައިން ކައިރި ސަރަހައްދު: 115 ޖާގަ
- ގާޒީ ސްކޫލު ސަރަހައްދު: 254 ޖާގަ
- ހިޔާ ޓަވަރު 16 ސަރަހައްދު: 1233 ޖާގަ
- ވިނަރެސް ސަރަހައްދު: 362 ޖާގަ
އެޗްޑީސީން ބުނީ ވަގުތީ އިންތިޒާމުގެ ސަބަބުން ހުޅުމާލޭގެ މަގުތަކުގެ ތޮއްޖެހުން ކުޑަވެ، މަގު ބޭނުންކުރާ ހުރިހައި ފަރާތްތަކަށް ލުއިފަސޭހަވެ،ރައްކާތެރިކަން ބޮޑުވާނެ ކަމަށެވެ. އަދި މާލެ ސަރަހައްދުގެ ޕާކިން މައްސަލައަށް ދާއިމީ ހައްލެއް ހޯދުމުގެ މަސައްކަތް ކުރިއަށްދާއިރު، ވަގުތީ ޕާކިން ސަރަހައްދުތަކުގެ ސަބަބުން އުޅަނދު ގެންގުޅޭ ފަރާތްތަކަށް ވަރަށް ބޮޑު ލުއިފަސޭހައަކަށް ވާނެ ކަމަށް ވެސް ބުނެފައިވެ އެވެ.
ވަގުތީ ޕާކިން ސަރަހައްދުތައް ކަނޑައެޅުމުގެ މައިގަނޑު ބޭނުމަކީ، އެޗްޑީސީން ބުނިގޮތުގައި ހުޅުމާލޭގެ ޓްރެފިކް ފްލޯ ރަނގަޅުކުރުމާއި، މަގުތަކުގައި ވެހިކަލްތައް ޕާކުކުރުމުގެ ސަބަބުން ދިމާވާ ތޮއްޖެހުން ކުޑަކުރުމެވެ.
އެގޮތުން މާލޭގައި ޕާކިންގެ މައްސަލަ ބޮޑުވެފައިވާ މި ދަނޑިވަޅުގައި، ހުޅުމާލެއިން މިފަދަ ބޮޑު ޖާގައެއް ހަމަޖެއްސުމަކީ މަގުތަކުގެ ތޮއްޖެހުން ކުޑަކުރުމަށް އެޅުނު މުހިންމު ފިޔަވަޅެއްގެ ގޮތުގައި އެ ކުންފުނިން ވަނީ ސިފަކޮށްފަ އެވެ.
ޕާކު ކުރުމަށް ވަގުތީ ޒޯންތަކެއް ކަނޑައެޅުމުގެ އިތުރަށް އެޗްޑީސީން ދަނީ އެ މައްސަލައަށް ދާއިމީ ހައްލެއް ހޯދުމުގެ ގޮތުން ޕާކިން ބިލްޑިންތަކެއް ހެދުމުގެ މަސައްކަތް ކުރަމުން ނެވެ.
