މިދިޔަ ހަފްތާގައި ސަރުކާރުން އަމިއްލަ ކުންފުނިތަކަށް ހަވާލުކުރި 206 މަޝްރޫއަށް ލޯނު ދޫކުރަނީ އުސޫލުގެ ތެރެއިން ކަމަށް ބެންކް އޮފް މޯލްޑިވްސް ބީއެމްއެލް އިން ބުނެފި އެވެ.
އެ ކުންފުނިން މިހެން ބުނީ މަޝްރޫތަކަށް ލޯނު ދޫކުރަނީ ބެންކުގެ ބޯޑުގެ ހުއްދައާ ނުލައި އަދި ލޯނު ދިނުމުގެ އުސޫލާ ހިލާފަށް ފައިސާ ދޫކުރަމުންދާ ކަމަށް ކުރާ ތުހުމަތުތައް ދޮގުކޮށް ނެރުނު ބަޔާނެއްގަ އެވެ.
ބޭންކުން މިއަދު ނެރުނު ބަޔާނެއްގައި ބުނީ ބޭންކުގެ ބޯޑާއި މެނޭޖްމަންޓް މަސައްކަތް ކުރަނީ ފުރިހަމަ މިނިވަންކަމާ އެކީގައި ކަމަށާއި ބޭންކުން ހިފަހައްޓަމުން އަންނަ ކޯޕަރޭޓް ގަވަނަންސާއި ބައިނަލްއަގްވާމީ މިންގަނޑުތަކާ އެއްގޮތަށް ކަމަށެވެ. އަދި ބީއެމްއެލްގެ އޮނިގަނޑުތައް ގާއިމުކުރެވިފައި އޮތީ ރާއްޖޭގެ ބޭންކިން ގާނޫނާއި ގަވާއިދުތަކާ އެއްގޮތަށް، އެމްއެމްއޭ އިން ކަނޑައަޅާފައިވާ ޕްރޫޑެންޝަލް ރެގިއުލޭޝަންތަކާއި ސްޓޭންޑާޑްތަކުގެ އިތުރުން ބާސެލް އަދި FR 9 ފަދަ ބައިނަލްއަގުވާމީ ހަރުދަނާ ސްޓޭންޑާޑްތަކަށް ކަމަށް ބޭންކުން ބުންޏެވެ.
އެ ކުންފުނިން ބުނީ ބައިނަލްއަގުވާމީ އޮޑިޓް ފާމްތަކުން ގަވައިދުން ބޭންކު އޮޑިޓްކުރަމުން އަންނަ ކަމަށާއި މިނިވަން އޮޑިޓްތަކުން ބޭންކުގެ ހިންގުން ހަރުދަނާކަން ކަށަވަރުކުރެވޭ ކަމަށެވެ. ބޭންކު ހިނގަމުން އަންނަނީ ބޭންކުގެ ބޯޑުން ފާސްކުރާ ސްޓެރެޓެޖީގެ މައްޗަށާއި، ހިންގުމުގެ އެކި ދާއިރާތަކަށް ބޯޑުން ކަނޑައަޅާ ޕޮލިސީތަކާއި އެއްގޮތަށް ބޯޑުން ނިންމާ ނިންމުންތަކާއި ދޭ ލަފަ އާއި އިރުޝާދުގެ ވެސް ދަށުން ކަމަށް ބީއެމްއެލްއިން ބުނެފައި ވެއެވެ.
ބީއެމްއެލްއިން ބުނީ ލޯނު ދޫކުރަނީ އަނބުރާ ދެއްކުމުގެ ގާބިލުކަން ހުރި ނެތް މިންވަރާއި، ސިންގަލް ބޮރޯވާ އެކްސްޕޯޝާ އަދި ގްރޫޕް ބޮރޯވާ އެކްސްޕޯޝާ އަ ށްވެސް ބަލާފައި ކަމަށާއި ލޯނު ދެނީ އަންޑަ-ރައިޓިން އުސޫލާ އެއްގޮތަށް ކަމަށެވެ. ސަރުކާރުގެ މަޝްރޫއުތައް ލިބުނު ކުންފުނިތަކަކީ ބޭންކުގެ ކަސްޓަމަރުން ކަމަށްވާ ނަމަ ބޭންކުން މިހާރު ވެސް އަމަލު ކުރަމުން އަންނަ އުސޫލުގެ ތެރެއިން ލޯނަށް އެދެމުގެ ފުރުސަތު އެ ފަރާތްތަކަށް ވެސް އޮންނާނެ ކަމަށް ބުނެފައި ވެއެވެ.
