މާލޭގެ ހުޅަނގު ފަރާތުގައި އޮންނަ "ރަސްފަންނު" އާޓިފިޝަލް ބީޗުގެ މޫދަށް އެރޭ ސަރަހައްދު، ބޮޑު މަރާމާތަކަށްފަހު މިއަދު ހެނދުނު އާންމުންނަށް އަލުން ހުޅުވާލައިފިއެވެ.

އިމާރާތްކުރުމާއި ބިނާރާ ބެހޭ ވުޒާރާއިން މައުލޫމާތު ދެއްވި ގޮތުގައި، މިއަދު ހެނދުނުން ފެށިގެން އާންމު ރައްޔިތުންނަށް އެ ސަރަހައްދު ބޭނުންކުރެވޭނެއެވެ. މި ސަރަހައްދު މަރާމާތު ކުރުމަށްޓަކައި ބަންދުކޮށްފައި ވަނީ މިއަހަރުގެ އޭޕްރިލް މަހުގެ 9 ވަނަ ދުވަހުއެވެ.

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލުކޮށްގެން ކުރިއަށްގެންދިޔަ މި މަރާމާތުގެ މަސައްކަތްތައް އެއްކޮށް ނިންމައި، މިއަދު ހެނދުނުން ފެށިގެން އެތަން ވަނީ އާންމުންނަށް ބޭނުންކުރެވޭނެ ގޮތަށް ހުޅުވާލާފައެވެ.
އިމާރާތްކުރުމާއި ބިނާރާ ބެހޭ ވުޒާރާއިން ވިދާޅުވި ގޮތުގައި، މި މަޝްރޫއުގެ ދަށުން އެންމެ މުހިންމު މަސައްކަތެއްގެ ގޮތުގައި ކުރިއަށްގެންދިޔައީ ރަސްފަންނުގެ މޫދަށް އެރޭ ސަރަހައްދުގެ ފެން ދައުރުވުން ރަނގަޅުކުރުމުގެ މަސައްކަތެވެ. އެގޮތުން، އެ ސަރަހައްދުގެ އުތުރުން ފެންހިންދާ ނިޒާމެއް ގާއިމްކޮށް، ކުރިން ޖަހާފައިވާ ހިލަ ތޮށި ނެގުމަށްފަހު، ފެން ދައުރުކުރުމަށް ކަލްވާޓްސްތަކެއް ހިމަނައިގެން އަލުން ހިލަ ތޮށި ޖެހުމުގެ މަސައްކަތް ވަނީ ނިންމާފައެވެ.

ރަސްފަންނަކީ 2016 ވަނަ އަހަރު، މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހައުސިންގ މިނިސްޓަރުގެ މަގާމުގައި ހުންނެވިއިރު ތަރައްގީކޮށް ހުޅުވި ސަރަހައްދެކެވެ. މިއީ މާލޭގައި ދިރިއުޅޭ ރައްޔިތުންގެ ތެރެއިން ގިނަ ބަޔަކު މޫދަށް އެރުމަށާއި ހިތްއުފާކޮށްލުމަށް ބޭނުންކުރާ މުހިންމު ބިނާއެކެވެ.

މި މަރާމާތާއެކު، ރަސްފަންނު ބޭނުންކުރާ މީހުންނަށް އިތުރަށް ހިތްފަސޭހަ މާހައުލެއް ލިބިގެންދާނެ ކަމަށާއި، ބޭނުންވާ މުހިންމު ވަސީލަތްތައް ވެސް މިހާރު ގާއިމްކުރެވިފައިވާ ކަމަށް ކަމާބެހޭ ވުޒާރާއިން މައުލޫމާތު ދެއްވައެވެ. މީގެ ކުރިން މި ސަރަހައްދުގެ ފެން ނުސާފުވުމުގެ ޝަކުވާތައް އާންމުން ކުރަމުންދިޔަ ނަމަވެސް، މި އައު ބަދަލާއެކު އެ މައްސަލައަށް ހައްލެއް ލިބިގެންދާނެއެވެ.