މޯލްޑިވްސް ޕޯޓްސް ލިމިޓެޑް (އެމް.ޕީ.އެލް) ގެ ޓަގު އަދި ބާޖުފަހަރު އެޅުމަށް ބޭނުންކުރަމުންދިޔަ މޫރިންގ ބޮއެތައް މަރާމާތްކުރުމަށް ކުރިއަށް ގެންދާ މަސައްކަތުގެ ދަށުން، އެއް ބޮއެގެ މަރާމާތުގެ މަސައްކަތް ނިންމައި މިއަދު ވަނީ އަލުން ހަރުކޮށްފައެވެ.
މި ބޮއެ މަރާމާތްކުރުމުގެ މަސައްކަތް ކުރިއަށް ގެންގޮސްފައިވަނީ އެމް.ޕީ.އެލްގެ ފްލީޓް ސަރވިސަސް ޑިޕާޓްމަންޓްގެ މެރިން ފްލީޓް ސެކްޝަންގެ މުވައްޒަފުންނެވެ. މިއީ ކުންފުނީގެ އަމިއްލަ މުވައްޒަފުން އިސްނަގައިގެން ކުރިއަށް ގެންދިޔަ މުހިންމު މަސައްކަތެކެވެ.
ފާހަގަކޮށްލެވޭ ގޮތުގައި، މޫރިންގ ބޮއެ ހަރުކުރުމުގެ މަސައްކަތް މީގެ ކުރިން އާންމުކޮށް ކުރަމުން އައީ އަމިއްލަ ފަރާތްތަކާ ހަވާލުކޮށްގެންނެވެ. ނަމަވެސް، މި ފަހަރު މި މަސައްކަތް ކުރިއަށް ގެންގޮސްފައިވަނީ އެ ކުންފުނީގެ މެރިން ފްލީޓްގެ ޑައިވަރުންނެވެ. މިއީ ކުންފުނީގެ ހަރަދުތައް ކުޑަކުރުމަށާއި މުވައްޒަފުންގެ ހުނަރު ބޭނުންކުރުމަށް އެޅުނު މުހިންމު ފިޔަވަޅެކެވެ.
މި މޫރިންގ ބޮއެތައް އަލުން ބޭނުން ކުރަން ފެށުމާއެކު، މާލެ ވިޔަފާރި ބަނދަރުގެ ހުޅަނގު ފަރާތު ކީވޯލް ސަރަހައްދުގައި ކުރިއަށްދާ އެހެން އޮޕަރޭޝަންސްތަކަށް އިތުރު ލުއިފަސޭހަތަކެއް ލިބި، އެ ސަރަހައްދު އެހެން ބޭނުންތަކަށް ހުޅުވިގެންދާނެ ކަމަށް އެމްޕީއެލް އިން ބުންޏެވެ.
