ރާއްޖޭގެ އިސްލާމީ ޔުނިވާސިޓީގެ ޗާންސެލާ ކަމުގެ މަގާމުން އިސްތިއުފާ ދެއްވި ޑރ. މުހައްމަދު ޒާހިރު ކޮށްދެއްވި ހިދުމަތަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޝުކުރު އަދާކުރައްވައިފި އެވެ.
މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވި ބައްދަލުވުމެއްގައި، ރާއްޖޭގެ ތައުލީމީ ދާއިރާގެ ކުރިއެރުމަށާއި ތަރައްގީއަށް ޑރ. ޒާހިރު ކުރެއްވި އިހުލާސްތެރި ހިދުމަތްތައް ރައީސް ވަނީ ފާހަގަކުރައްވާފަ އެވެ. ވަކިން ހާއްސަކޮށް، އަސާސީ ތައުލީމުގެ މަޝްރޫއު ހިންގެވުމުގަޔާ، އަތޮޅުތަކުގައި ކޮމިއުނިޓީ ސްކޫލުތައް ބިނާކުރައްވައި، ރައްޔިތުން ހޭލުންތެރިކުރުވުމަށް އެމަނިކުފާނު ކުރެއްވި ބުރަ މަސައްކަތްޕުޅުތަކަށް ރައީސް ވަނީ ތައުރީފު ކުރައްވާފަ އެވެ.
މި ބައްދަލުވުމުގައި ވާހަކަފުޅު ދައްކަވަމުން ޑރ. ޒާހިރު ވިދާޅުވީ، އިސްލާމީ ޔުނިވާސިޓީގައި ހިދުމަތް ކުރެއްވުމަކީ ލިބިވަޑައިގެންނެވި ވަރަށް ބޮޑު ޝަރަފެއް ކަމަށެވެ. އަދި މި ސަރުކާރުން ވެސް އެ ފުރުސަތު ދެއްވީތީ ރައީސްއަށް ޝުކުރު ދަންނަވައި، ރާއްޖޭގެ ތައުލީމީ ނިޒާމު ހަރުދަނާކުރަން ރައީސް ކުރައްވާ މަސައްކަތްޕުޅުތަކަށް ތައުރީފު ކުރެއްވި އެވެ.
މީގެއިތުރުން، ޑރ. ޒާހިރު ދައުލަތަށް ކޮށްދެއްވި ހިދުމަތްތަކުގެ އަގުވަޒަންކުރެއްވުމުގެ ގޮތުން، ރައީސް ވަނީ އެމަނިކުފާނަށް ހާއްސަ ސިޓީފުޅެއްވެސް އަރުވާފަ އެވެ. އެ ސިޓީފުޅުގައި، އިސްލާމީ ޔުނިވާސިޓީއާއި ގައުމީ ޔުނިވާސިޓީގެ ޗާންސެލާ ކަމުގެ މަގާމުގެ އިތުރުން، 10 އަހަރަށްވުރެ ދިގު މުއްދަތެއްގައި އެޑިޔުކޭޝަން މިނިސްޓަރުކަމުގެ މަގާމުގައި ހުންނަވައިގެން، ރާއްޖޭގެ ތައުލީމީ މުގައްރަރުތައް ޒަމާނާ އެކަށޭނަ އަދި ދިވެހިވަންތަ ނިޒާމަކަށް ބަދަލުކުރެއްވުމަށާއި، އަރަބި އިސްލާމީ ތައުލީމު ފުޅާކުރެއްވުމަށް ކުރެއްވި މުހިންމު މަސައްކަތްޕުޅުތައް ފާހަގަކުރައްވާފައިވެ އެވެ.
ޑރ. މުހައްމަދު ޒާހިރު ހުސައިނަކީ 49 އަހަރަށްވުރެ ދިގު މުއްދަތެއްގައި ދައުލަތަށް ހިދުމަތްތަކެއް ކުރައްވާފައިވާ ބޭފުޅެކެވެ.
