ޗައިނާ- މޯލްޑިވްސް ހިއުމަން ރިސޯސަސް ޓްރެއިނިން ޕްރޮގްރާމްގެ ބައިވެރިންގެ އަގުވަޒަން ކުރުމުގެ ގޮތުން ރާއްޖޭގައި ހުންނަ ޗައިނާ އެމްބަސީން ހާއްސަ ރިސެޕްޝަނެއް ބާއްވައިފި އެވެ.

މި ރަސްމިއްޔާތުގައި ދިވެހި ސަރުކާރުގެ ފަރާތުން ބައިވެރިވެވަޑައިގެންނެވި ބޭފުޅުންގެ ތެރޭގައި އެޑިޝަނަލް ސެކްރެޓަރީ އަމީން ޖާވިދު ފައިސަލް ހިމެނިވަޑައިގެންނެވި އެވެ.
ޗައިނާ އެމްބަސީން ހާމަކުރެއްވި ގޮތުގައި، 2025 ވަނަ އަހަރުގެ ނިޔަލަށް 287 ދިވެހިން ޗައިނާގެ އެހީތެރިކަމާއެކު ހިންގުނު ތަމްރީން ޕްރޮގްރާމްތައް ފުރިހަމަކޮށްފައިވެ އެވެ.

މި މަސައްކަތަކީ، ފަސް އަހަރުގެ ތެރޭގައި ދިވެހި ސިވިލް ސާވިސްގެ 1000 މުވައްޒަފުން ތަމްރީނު ކުރުމަށް ދެ ގައުމުން އެއްބަސްވެފައިވާ ލަނޑުދަނޑިއަށް ވާސިލުވުމަށް ކުރަމުންދާ މަސައްކަތެއްގެ ބައެކެވެ. ޗައިނާ އިން ބުނެފައިވަނީ، އެ ގައުމުގެ ގުޅުމަކީ ސިޔާސީ އެއްވެސް ކަމެއްގެ މައްޗަށް ބިނާވެފައިވާ ކަމެއް ނޫން ކަމަށާއި، އެއީ ރާއްޖޭގެ ކެޕޭސިޓީ ބިލްޑިން އާއި، ރާއްޖޭގެ މިނިވަން ތަރައްގީއަށް އެހީތެރިކަން ފޯރުކޮށްދިނުން ކަމަށެވެ.

މި ބައްދަލުވުމުގައި ބައިވެރިންނަށް ހިތްވަރު ދެއްވީ، އެބޭފުޅުންގެ އާ ހުނަރުތަކާއި، ލިބުނު ތަޖުރިބާގެ ބޭނުން ހިފައި، ދެ ގައުމުގެ ދެމެދުގައި އޮތް އެކުވެރިކަމުގެ ގުޅުން ބަދަހިކުރުމުގައި މުހިންމު ދައުރެއް އަދާކުރުމަށެވެ.

ޗައިނާ އެމްބަސީން ވަނީ 2026-2027 ވަނަ އަހަރަށް ޗައިނާ ސަރުކާރުގެ ސްކޮލަރޝިޕަށް ކުރިމަތިލުމުގެ ފުރުސަތު މިހާރު ހުޅުވާލެވިފައިވާ ކަމުގެ މައުލޫމާތުވެސް ދީފަ އެވެ.
މި ބައްދަލުވުން ނިންމާލެވުނީ، ރާއްޖެއާއި ޗައިނާއާ ދެމެދު އޮތް ގާތް ރަހުމަތްތެރިކަމުގެ ގުޅުން އިތުރަށް ބަދަހިކުރުމަށް ދެ ގައުމުން ކުރަމުންދާ މަސައްކަތްތައް ފާހަގަކުރައްވަމުންނެވެ.