އިޒްރޭލުން ފަލަސްތީނުގެ ޣައްޒާ ހިސާރުކޮށްފައި އޮންނަ އޮތުމާ ދެކޮޅު ހެދުމަށާއި ގާޒާއަށް ބޭނުންވާ އެހީ ހިފައިގެން ކަނޑު މަގުން ދަތުރުކޮށްފައިދާ ގްލޯބަލް ސުމޫދު ފްލޯޓިލާގެ ބޯޓުތަކަށް އިޒްރޭލުން އިއްޔެ ހުރަސް އަޅައި ހައްޔަރުކުރި މީހުންގެ ހާލު ރަނގަޅު ކަމަށް ބޭރުގެ މީޑިއާތަކުން ރިޕޯޓުކޮށްފި އެވެ.

އިޒްރޭލުގެ ރަސްމީ އިދާރާތަކާ ހަވާލާދީ 'އަލް ޖަޒީރާ' އިން ރިޕޯޓުކޮށްފައިވާ ގޮތުގައި އެ ބޯޓުތަކުން އިޒްރޭލުގެ މިލިޓަރީ ބާރުތަކުން ރޭ ހައްޔަރުކުރި އެންމެން ވެސް ތިބީ ސަލާމަތުން ނެވެ. އަދި އެ އެންމެންގެ ހާލު ރަނގަޅު ކަމަށް ވެސް ރިޕޯޓުކޮށްފައިވެ އެވެ.

އެ ނޫހުން ރިޕޯޓުކުރި ގޮތުގައި މިލިޓަރީގެ ބެލުމުގެ ދަށުގައި ތިބިި އެކްޓިވިސްޓުންނަށް މިއަދު އިޒްރޭލަށް ވާސިލުވެވޭނެ އެވެ.

ސުމޫދު ފްލޮޮޓިއްލާގެ ހަރަކާތުގައި ބައިވެރިވާ އެކްޓިވިސްޓުންގެ އަދަދު 500އަށް އަރާއިރު، އޭގެތެރޭގައި ބައެއް ގައުމުތަކުގެ ގާނޫނު ހަދާ މަޖިލީހުގެ މެންބަރުންނާއި، ގާނޫނީ ވަކީލުން ވެސް ހިމެނެއެވެ. އެ ބޯޓުތަކުގައި ތިބި ގާނޫނީ ވަކީލުން ދަނީ ބައިނަލްއަގްވާމީ ގާނޫނުތަކާ ޚިލާފަށް އިޒްރޭލުން ހިންގަމުންދާ އަމަލުތައް ރެކޯޑުކޮށް އިންޓަނޭޝަނަލް ކޯޓް އޮފް ޖަސްޓިސް އަށް ހުށަހެޅުމަށް ތައްޔާރުވަމުން ނެވެ.

ދިވެހިން ވެސް މި ހަރަކާތުގައި ބައިވެރިވެ އެވެ.

ގާޒާ އަށް ކުރާ މި ދަތުރު އިންތިޒާމު ކުރާ ފަރާތުން ބުނީ، ފްލޯޓިލާގައި ހިމެނޭ 13 އުޅަނދަކަށް ޔަހޫދީ ސިފައިން އަރައިގަނެ، ހުއްޓުވާފައިވާ ކަމަށެވެ. އަދި، އިތުރު 30 އުޅަނދު މިހާރު ވެސް ގާޒާއަށް ދަތުރު ކުރަމުންދާ ކަމަށް ވެސް ބުނެފައިވެ އެވެ.