ސައުތު އޭޝިއަން ސުޕަރ ކަޕް 2025 ކާމިޔާބުކުރި ދިވެހިރާއްޖޭގެ ޤައުމީ ފުޓުބޯޅަ ޓީމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ސާބަސްދެއްވައިފި އެވެ.

މިއަދު ސްރީލަންކާގެ ޓީމާ ދެކޮޅަށް ކުޅުނު މެޗުން އެއްވަރުވި ނަމަވެސް މުބާރާތުގެ ޗެމްޕިއަންކަން ދިވެހިރާއްޖެއަށް ލިބުނީ އެގްރެގޭޓް ނަތީޖާއިން ދިވެހި ޤައުމީ ޓީމު ކުރިހޯދާފައިވާތީއެވެ. މިކަމާ އުފާފާޅުކުރައްވައި އެކްސްގައި ކުރެއްވި ތަހުނިޔާގެ ޕޯސްޓުގައި ރައީސުލްޖުމްހޫރިއްޔާ ވަނީ، ޓީމު ހޯދި ކާމިޔާބީއަށްޓަކައި ފަޚުރުވެރިވެވަޑައިގަންނަވާ ކަމަށް ވިދާޅުވެ ފައެވެ.

ދިވެހިރާއްޖޭގައި އިހު އޮތް ފުޓުބޯޅައިގެ ރޫޙު އާލާކޮށް، ފުޓުބޯޅަ އާއި އެ ނޫންވެސް ކުޅިވަރުތައް ކުރިއެރުވުމަކީ، މި ސަރުކާރުން ވަރަށް ބޮޑު އަހުމިއްޔަތުކަމެއް ދެއްވާ ކަމެކެވެ. އެގޮތުން ރާއްޖޭގެ ހުރިހާ ކަންކޮޅުތަކެއްގައި ކުޅިވަރާއި ހަށިހެޔޮކަމަށް ބޭނުންވާ ބިނާރު ޤާއިމުކުރެއްވުމުގެ މަސައްކަތް މި ސަރުކާރުން، ހަރު ދުވެލީގައި ގެންދަވަނީ ކުރައްވަމުންނެވެ.

ދެ މެޗުގެ އުސޫލުން ކުޅުނު މި މުބާރާތުގައި ވާދަކުރީ ރާއްޖެ އާއި ލަންކާ އެކަންޏެވެ. ލަންކާ އިން އިންތިޒާމުކުރި މި މުބާރާތަށް 4 ގައުމަށް ދައުވަތު ދިން ނަމަވެސް، ދައުވަތު ގަބޫލުކުރީ ރާއްޖެއިން އެކަންޏެވެ.

ރާއްޖެއިން މުބާރާތް ކާމިޔާބުކުރީ ކާމިޔާބުކުރީ ފަހު މެޗުގައި އިއްޔެ ކޮޅުނބުގެ ރޭސްކޯސް ގްރައުންޑުގައި ލަންކާއާ 1-1 އިން އެއްްވަރުވެ، ފުރަތަމަ މެޗުން 3-0 އިން މޮޅުވެފައިވާތީ ޕޮއިންޓް އުސޫލުންނެވެ.

ގައުމީ ޓީމު އެނބުރި ރާއްޖެ އަންނާނީ މިއަދު މެންދުރުފަހު 2:25 ގައި ޖައްސާ ސްރީ ލަންކަން އެއާލައިންސް އިންނެވެ. ޓީމަށް އެންމެ ފުރަތަމަ މަރުހަބާ ކިޔުން އޮންނާނީ ވެލާނާ އިންޓަނޭޝަނަލް އެއާޕޯޓުގެ ވީއައިޕީ ލައުންޖުންނެވެ. އޭގެ ފަހުން ޓީމު މާލެ އައުމުން، މަރުހަބާ ކިޔަން ގަލޮޅު ދަނޑުގައި ރަސްމިއްޔާތެއް ބާއްވާނެ އެވެ.