ރާއްޖޭގެ ޖުމްލަ އާބާދީގެ ބޮޑު ބައެއް މާލެ ސަރަހައްދަށް ތަރުކަޒުވެފައިވާކަން، މޯލްޑިވްސް ބިއުރޯ އޮފް ސްޓެޓިސްޓިކްސްއިން އާންމުކުރި އެންމެ ފަހުގެ ތަފާސްހިސާބުތަކުން ހާމަވެއްޖެއެވެ.
ދުނިޔޭގެ އާބާދީ ދުވަހާ ގުޅުވައިގެން ނެރުނު މި ހިސާބުތައް ދައްކާގޮތުން، ރާއްޖޭގެ އާބާދީގެ 43 އިންސައްތަ މީހުން ދިރިއުޅެމުންދަނީ ވެރިރަށް މާލޭގައެވެ. އޭގެތެރެއިން ކޮންމެ ތިން މީހަކުން އެކަކީ ބިދޭސީއެކެވެ.
ތަފާސްހިސާބުތަކުން ދައްކާ ގޮތުގައި:
- މާލޭގެ އާބާދީއަކީ 254,556 މީހުން (168,931 ދިވެހިންނާއި 85,625 ބިދޭސީން ހިމެނޭ)
- ރާއްޖޭގެ ހުރިހާ ރަށްތަކެއްގައި ދިރިއުޅެނީ ޖުމްލަ 335,522 މީހުން (އަތޮޅުތެރޭގެ އާބާދީގައި ހިމެނެނީ 225,123 ދިވެހިންނާއި 110,399 ބިދޭސީން)ނެވެ.
ރާއްޖޭގެ ޖުމްލަ އާބާދީގެ އަންދާޒާއަކީ 590,079 ކަމަށްވާއިރު، މީގެ ތެރޭގައި ހިމެނެނީ 394,054 ދިވެހިންނާއި 196,024 ބިދޭސީންނެވެ. މީގެ ތެރެއިން 374,168 އަކީ ފިރިހެނުންނެވެ. އަދި އަންހެނުންގެ އަދަދަކީ 215,911 އެވެ. ފާހަގަކޮށްލެވޭ ގޮތުގައި، ރާއްޖޭގައި އުޅޭ ފިރިހެނުންގެ 47 އިންސައްތައަކީ ބިދޭސީންނެވެ.
ބިދޭސީންގެ އާބާދީއަށް ބަލާއިރު، މާލޭގައި ދިރިއުޅޭ ކޮންމެ ތިން މީހަކުން އެކަކީ ބިދޭސީއެކެވެ. އަދި އިދާރީ ރަށްރަށުގައި ކޮންމެ ފަސް މީހަކުން އެކަކީ ބިދޭސީއެކެވެ. ބިދޭސީ ފިރިހެނުންގެ އަދަދު 174,005 ގައި އުޅޭއިރު، ބިދޭސީ އަންހެނުންގެ އަދަދަކީ 22,019 އެވެ. މަސައްކަތު އުމުރުފުރާގެ އާބާދީގައި ވެސް ދިވެހި ފިރިހެނުންނަށްވުރެ ބިދޭސީ ފިރިހެނުން ގިނަކަން މި ތަފާސްހިސާބުތަކުން ސާފުވެއެވެ.
އުމުރުފުރާތަކަށް ބަލާއިރު، ރާއްޖޭގައި އެންމެ ގިނައީ 36 އަހަރާއި 64 އަހަރާ ދެމެދުގެ މީހުންނެވެ. އެއީ އާބާދީގެ 37 އިންސައްތަ ނުވަތަ 144,606 މީހުންނެވެ. ދެވަނައަށް އެންމެ ގިނައީ 17 އަހަރުން ދަށުގެ ކުޑަކުދިންނެވެ. އެއީ 114,361 ކުދިންނެވެ. އާބާދީގައި އެންމެ މަދީ 65 އަހަރުން މަތީގެ މީހުންނެވެ. އެއީ 26,825 މީހުންނެވެ.
ރާއްޖޭގެ އަތޮޅުތަކުގެ ތެރެއިން އާބާދީ އެންމެ ބޮޑު ފަސް ސަރަހައްދުގެ ގޮތުގައި ފާހަގަކުރެވިފައިވަނީ އައްޑޫ ސިޓީ، ހދ. އަތޮޅު، ކ. އަތޮޅު، ރ. އަތޮޅު އަދި ލ. އަތޮޅެވެ. މީގެ ތެރެއިން ބިދޭސީންގެ އާބާދީ އެންމެ ބޮޑީ ކާފު އަތޮޅުގައެވެ.
މި ތަފާސްހިސާބުތަކުން ހާމަވާ ގޮތުގައި، ރާއްޖޭގެ އާބާދީ މާލެއަށް ތަރުކަޒުވުމުގެ މައްސަލައާއި ބިދޭސީންގެ އާބާދީ އިތުރުވަމުންދާ މައްސަލައަކީ ގައުމީ ފެންވަރުގައި ބޮޑު ސަމާލުކަމެއް ބޭނުންވާ ކަންކަމެވެ.
