ޕީއެންސީއަކީ މިހާރު ރާއްޖޭގައި އޮތް އެންމެ ހަރުދަނާ ސިޔާސީ ޕާާޓީކަމަށާއި، ގައުމުގެ މަސްލަހަތާއި ތަރައްގީއަށް މަސައްކަތްކުރާ ޕާޓީއަކީ ޕީއެންސީ ކަމަށް ލޯކަލް ގަވަރނެންސް މިނިސްޓަރު އާދަމް ޝަރީފް ވިދާޅުވެއްޖެ އެވެ.
މިނިސްޓަރު މިފަދައިން ވިދާޅުވީ. މިރޭ މާލޭ ހެންވޭރު އުތުރު ދާއިރާގެ ކެމްޕޭން ޖަގަހަ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
"ރާއްޖޭގައި އޮތް އެންމެ ހަރުދަނާ ސިޔާސީ ޕާާޓީއަކީ، އަދި މިވަގުތު ރާއްޖޭގެ ރައްޔިތުންގެ މަސްލަހަތަށްޓަކައި، ގައުމުގެ ހަމަޖެހުމަށްޓަކައި، ތަރައްގީއަށްޓަކައި، އަދި އަޅުގަނޑުމެންގެ ތެރޭގައި ހަމަހަމަކަން ގާއިމުކުރުމަށް ޓަކައި، މަސައްކަތްކުރާ ޕާޓީއަކީ ޕީއެންސީ ކަމަށްވާތީއާ، ރައީސުލްޖުމުހިއްޔާގެ ތަސައްވަރެއް އޮވެގެން ރައްޔިތުންނަށް ބޭނުންވާ ވަރަށް ހާއްސަ މަގުސަދުތަކެއް ހާސިލުކުރުމަށްޓަކައި ކުރަން ހުރި ކަންތައްތަކެއް ބޮޑު ފޮތެއްގެ ސިފައިގައި ލިޔުއްވައިގެން ހަމައެކަނި ވެރިއަކީ ރައީސް ޑރ މުހައްމަދު މުއިއްޒު ކަމަށްވެފައި، އެމަނިކުފާނުގެ ލީޑަރޝިޕް އޮތް ޕާޓީއިން ނިކުމެ، މިކުރަން އުޅޭ މަސައްކަތަކީ ގައުމު ކުރިއަށް ގެންދިއުމުގައި ރައްޔިތުންނަށް ބޭނުންވަ ހިދުމަތްތައް އަވަހަށް ފޯރުކޮށްދޭނެ މަސައްކަތްކުރާނެ އިތުރު މަދަދުގާރުންތަކެއް ހޮވުމުުގެ މަަސައްކަތެއް."
މިނިސްޓަރު ވިދާޅުވީ އެކަމަށް އެކަށޭނެ ބަޔަކީ ދޫނި ޓީމުގެ ކެނޑިޑޭޓުން ކަމަށާއި، ދޫންޏަށް ވޯޓު ދިނުމުން، އެ ދެވުނީ ރަނގަޅު ވޯޓެއް ކަމަށެވެ. މިނިސްޓަރު ވިދާޅުވީ ޕީއެންސީއިން މަސައްކަތްކުރަނީ ތަރައްގީއަށް ކަމަށެވެ. ރައީސްގެ ތަސައްވަރުގައި ރައްޔިތުންނަށް ފޯރުކޮށްދޭން ހުރި ހިދުމަތްތައް އަވަހަށް ފޯރުކޮށްދެވޭނެ ގޮތަކަށް މަސައްކަތްކުރާނެ ބަޔަކީ ޕީއެންސީ ކަމަށް މިނިސްޓަރު ވަނީ ވިދާޅުވެފައެވެ.
މިނިސްޓަރު އިތުރަށް ވިދާޅުވީ އިދިކީލި ފިކުރުތައް ގިނަވެއްޖެނަމަ، އެ އިދިކީލިކަން ކުޑަކުރުމަށް ކުރަންޖެހޭ މަސައްކަތްތައް ގިނަ ވާނެ ކަމަށާއި ޕީއެންސީގެ ފިކުރު ނޫން އެެހެން ފިކުރުގެ ބަޔަކު ތިބެއްޖެނަމަ، ޕީއެންސީގެ ފިކުރު އޮޅުންފިލުވައިދޭން ހޭދަކުރަންޖެހޭ ވަގުތު އިތުރުވާނެކަމަށެވެ، އެއީ ގައުމު ތަރައްގީކުރުމަށް ގެއްލިގެންދާ ވަގުތެއް ކަމަށް މިނިސްޓަރު ވަނީ ވިދާޅުވެފައެވެ.
މިނިސްޓަރު ވިދާޅުވީ، ރައްޔިތުންނަށް އޮތް ގޮތަކީ ދޫންޏަށް ވޯޓު ދިނުން ކަމަށާއި ހަގީގަތަކީ، ތެލާއި ފެނާ އެއް ނުވާނެ ކަމަށެވެ.
"ތަރައްގީއަށް މަސައްކަތްކުރާ ބަޔަކު ކިތަންމެ ވަރަކަށް ތަރައްގީ ކުރިއަށް، އެތަން ގަޑުބަޑު ކުރާ ބަޔަކު ތިބިއްޖެނަމަ ތަރައްގީއަށް ހުރަސް އެޅޭނެ."
ނިންމާލަމުން މިނިސްޓަރު ވަނީ ރައީސް ޑރ މުއިއްޒު އަދި މަޖިލީހަށް ކުރި އިތުބާރާއެކު، ދާއިރާއަށް ކުރިމަތިލެއްވި ބޭފުޅުންނާއި ޑަބްލިއުޑީސީގެ ބޭފުޅުންނަށް ވޯޓު ދިނުމަށް އެދިވަޑައިގެންފައެވެ.
