ސަރުކާރުގެ "ބޯހިޔާވަހިކަން އެންމެންނަށް" މި ސިޔާސަތުގެ ދަށުން، އަނބިމީހާ/ފިރިމީހާގެ ބޯހިޔާވަހިކަމެއް އޮތް ނަމަވެސް ގޯއްޗަށް އެދި ހުށަހެޅުމަށް އަންނަ އާދީއްތަ ދުވަހު ހުޅުވާލުމަށް މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ އިން ނިންމައިފިއެވެ.

އެމިނިސްޓްރީ އިން ވަނީ  'ގޯތި-ގެދޮރު' ފްރޮގްރާމުގެ ދަށުން މާލޭގައި ދިރިއުޅޭ ރައްޔިތުންނަށް ދިރިއުޅުމަށް ބަންޑާރަ ގޯތި ދޫކުރުމުގެ އުސޫލު އާންމުކޮށްފަ އެވެ.

މި އުސޫލުގެ ދަށުން ގޯއްޗަށް ކުރިމަތިލުމަށް ހުޅުވާލާނީ އަންނަ އާދީއްތަ ދުވަހުގައެވެ. ދެ ކެޓަގަރީއަކށް ގޯތި ދޫކުރުމަށް ވަނީ ހަމަޖެހިފައެވެ. އުސޫލުގެ ދަށުން ދޫކުރަން ހަމަޖެހިފައިވަނީ ރަސްމާލެއިން 1250 (ބާރަސަތޭކަ ފަންސާސް) އަކަފޫޓުގެ ގޯއްޗެވެ.

އުސޫލުގައި ހިމެނޭ މައި ކެޓަގަރީތަކަކީ، ކެޓަގަރީ-1، މާލޭ ރަށްވެހިންނާއި ކެޓަގަރީ–2، މާލޭގައި ދިރިއުޅޭ އެހެން ރަށްރަށުގެ ރަށްވެހިންނެވެ.

މީގެ ކުރިން ހުޅުވާލި ބޯހިޔާވަހިކަމުގެ ސްކީމްގެ ދަށުން ދެމަފިރިންނަށް ބޯހިޔާވަހިކަމެއް ނުލިބެ އެވެ. އެގޮތުން ދެމަފިރިންގެ ތެރެއިން އެކެއްގެ ގޯއްޗެއް އޮތް ނަމަ އަނެކަކަށް ޝަރުތު ހަމައެއް ނުވެ އެވެ. ސަރުކާރުން އޭރު ބުނީ އެގޮތަށް ޝަރުތު ކަނޑައަޅާފައި އޮތީ އާއިލީ ބޯހިޔާވަހިކަމުގެ ސިޔާސަތުގެ ދަށުން އެއްވެސް ވަރަކަށް ބޯހިޔާވަހިކަން ނެތް އާއިލާތަކަށް ބޯހިޔާވަހިކަން ފޯރުކޮށްދިނުމުގެ ގޮތުން ކަމަށެވެ.

އެކަމާ މެދު ގިނަ ބައެއްގެ ފާޑުކިޔުން އަމާޒުވި ނަމަވެސް ސަރުކާރުން އެންމެ އިސްކަން ދެނީ ކޮންމެ އާއިލާއަކަށް ވެސް ބޯހިޔާވަހިކަމެއް ކަށަވަރުކުރުމަށް ކަމަށް ބުނެފައިވެ އެވެ. އޭގެ ފަހުން ހުޅުވާލި މި ސްކީމަކީ ދެމަފިރިންނަށް ވަކިން ވެސް ބޯހިޔާވަހިކަން ލިބޭނެހެން ޝަރުތު އިސްލާހުކޮށް ހުޅުވާލި ވަކި ސްކީމެކެވެ. އެކަމަކު މި ސްކީމްގެ ދަށުން ބޯހިޔާވަހިކަން ލިބެނީ ވެސް ކުރީގެ ސްކީމެކޭ އެއްގޮތަށް މާލެ ރައްޔިތުން ނުވަތަ މާލޭގައި ދިރިއުޅޭތާ 15 އަހަރު ވެފައިވާ މީހުންނަށެވެ.

މި އުސޫލުގެ ދަށުން އެޕްލިކޭޝަން ހުށަހެޅުމަށް ހަމަޖެހިފައިވަނީ އަންނަ އަދީއްތަ ދުވަހުގެ ހެނދުނު 11:00 އިން  އޭޕްރީލްމަހުގެ 30 ވަނަ ދުވަހުގެ 23:59 ގެ ނިޔަލަށެވެ.އެޕްލިކޭޝަން ހުށަހަޅާނީ https://boahiyaavahikan.housing.gov.mv ޕޯޓަލް މެދުވެރިކޮށެވެ.