މެދުއިރުމަތީގެ ހަނގުރާމައާ ގުޅިގެން ނުފުރި ތާށިވެފައިވާ ފަތުރުވެރިން ގެންދިއުމަށް އެމިރޭޓްސްގެ އެއަރލައިންތަކުން ރާއްޖެ އަންނަން ފަށައިފި ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެއެވެ.
ނޫސްވެރިންނާ ބައްދަލުކުރައްވާ މިނިސްޓަރު ވިދާޅުވީ، މިހާރު ބައެއް ކޮމާރޝިއަލް ފްލައިޓްސް ތައް އޮޕަރޭޓް ކުރަން ފަށައިފި ކަމަށާއި، ފަސިންޖަރުން ގެންދިއުމަށް ރޭ ވެސް އެމިރޭޓްސްގެ އެއަލައިންއެއް ރާއްޖެ އައިސްފައިވާކަމަށެވެ.
"ރޭގައިވެސް އެމިރިއެޓްސްގެ ފްލައިޓެއް ރާއްޖެއަށް ރެސްކިއުކުރުމަށްޓަކައި ވަރަށް ކުޑަކުޑަ ދާއިރާއެއްގައި ކޮރިޑޯއެއް ހުޅުވައިގެން އެއަރސްޕޭސްގެ އެ ބޭފުޅުން އޮޕަރޭޓްކުރަމުން މިއަދުވެސް ފްލައިޓެއް އަންނާނެ. "
ޔޫއޭއީގެ ދުބާއީ އެއާޕޯޓާއި ޝާރްޖާ އެއާޕޯޓުގައި ވެސް، ރާއްޖެ ހިމެނޭ ގޮތަށް ވަރަށް ކުޑަ ކޮރިޑޯއެއްގެ ތެރެއިން ފްލައިޓް އޮޕަރޭޝަންތައް ކުރިއަށްގެންދާ ކަމަށް އަމީން ވަނީ ވިދާޅުވެފައެވެ. އަމީން ވިދާޅުވީ ރާއްޖެއަށް އެންމެ ގިނަ ދަތުރުކުރާ އެއަރޕޯޓަކީ ދޯހާ އެއަރޕޯޓްކަމަށާއި،އެ އެއާޕޯޓް އަދިވެސް އޮތީ ބަންދުކޮށްފައި ކަމަށެވެ.މިނިސްޓަރު އިތުރަށް ވިދާޅުވީ،އޮމާންގެ މަސްކެޓް އެއާޕޯޓަށް ވެސް، ބައެއް ދަތުރުތައް އަލުން ފަށާފައިވާ ކަމަށެވެ.
މެދުއިރުމަތީގެ ހަމަނުޖެހުންތަކާ ގުޅިގެން ރާއްޖެއަށް އެންމެ ގިނައިން ފަތުރުވެރިން އުފުލާ ބޮޑެތި އެއާލައިންތަކުގެ ފްލައިޓްތައް ދަނީ ކެންސަލްކުރަމުންނެވެ. އެކަމުގެ ސަބަބުން މެދުއިރުމަތިން ރާއްޖެއަށް އައި ފަތުރުވެރިންނަށް ނުފުރި ވަނީ ރާއްޖޭގައި ތާށިވެފައެވެ. މިކަމުގެ ސަބަބުން ރާއްޖޭގެ ޓޫރިޒަމް އަށް ވަނީ ވަރަށް ބޮޑު އަސަރެއް ކޮށްފައެވެ. ސަރުކާރުން ދަނީ މިކަމަާއި ގުޅިގެން ހާއްސަ ކޮމެޓީއެއް އެކުލަވާލައި. މިކަމާއި ގުޅިގެން ދިމާވާ ގޮންޖެހުންތައް ހައްލުކުރުމަށް މަސައްކަތްކުރަމުންނެވެ.
