އެކި ސަބަބުތަކާއި ހުރެ، މާލޭގައި ގޯތި ނުހެދި އަދި ކުދި ކުދި ތަންތަންކޮޅުގައި އުޅޭ މީހުންގެ ހާލަތު ބަދަލުކުރުމަށް ސަރުކާރުން މަސައްކަތް ކުރާނެ ކަމަށް ހައުސިން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްޠަލިބު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ، މާލޭއަށް ނިސްބަތްވާ އާއިލާތަކުގެ ތެރެއިން އެކިއެކި ސަބަބުތަކާއި ހުރެ ގޯތި ނުހެފހި، ގޯތި ބައިބައިކޮށްގެން ކުދި ތަންތަންކޮޅުގައި އުޅޭ ދަތި ހާލަތު ސަރުކާރުގެ ސަމާލުކަމަށް އައިސްފައިވާ ކަމަށެވެ.
މިނިސްޓަރު ވިދާޅުވީ، މިފަދަ ތަތި ހާލުގައި އެ އާއިލާތައް ދިރިއުޅެން ޖެހޭ ސަބަބަކީ، މާލޭގައި އޮތް ބިމުގެ ދަތި ކަމެވެ. މިނިސްޓަރު ވިދާޅުވީ އިންސާނުންނަށް އެކަށީގެންވާ ގޮތަށް ދިރިނޫޅެވޭނެ ތަންތަން ވެސް މާލޭގައި އެބަހުރި ކަމަށެވެ.
" އެކަކަށް ވަދެވޭ ވަރުގެ ކުދި ހަނި ގޯޅިތައް ވެސް އެބަހުރި. އެކަމަށް އަރިއަކަށް ހުރެގެން ވަންނަން ޖެހޭ ހަނި ގޯޅިތައް ވެސް އަޅުގަނޑުމެންނަށް ފެނިފައި އެބަހުރި. އެއްވެސް ކަހަލަ ވެންޓިލޭޝަނެއް ނެތް"
މިނިސްޓަރު ވިދާޅުވީ އެ އާއިލާތަކަކީ ސަރުކާރުން އުސޫލްތައް ކަނޑައަޅައިގެން ހިންގާ ޕްރޮގްރާމްތަކުގެ ތެރެއިން ބޯހިޔަވާކަމުގެ ފުރުސަތު އަދި ނުލިބޭ އާއިލާތައް ކަަމަށެެވެ. އެފަދަ ތަންތަން ދެނެގަނެ، އެ އާއިލާތަކުގެ ހާލަތު ރަނގަޅު ކުރުމަަށް ސަރުކާރުން މަސައްކަތް ކުރާނެ ކަމަށް މިނިސްޓަރު ވިދާޅުވިއެވެ.
