ވޯޓުލުމަށް ރަޖިސްޓަރީ ކޮށްފައިވާ ފޮށީގެ މައުލޫމާތު ހިމެނޭ ރަޖިސްޓަރީއާ ގުޅިގެން ޝަކުވާ ހުށަހެޅުމަށް އިލެކްޝަންސް ކޮމިޝަންސް އިން ހުޅުވާލައިފި އެވެ.

އީސީ އިން ބުނީ، މާދަމާ މެންދުރު ފަހު 1:30 އާ ހަމައަށް ޝަކުވާ ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ.މި މުއްދަތުގައި ޝަކުވާ ހުށަހަޅަން ބޭނުންވާ ފަރާތްތަކުން، އެ ކޮމިޝަނުގެ މައިޕޯޓަލް މެދުވެރިކޮށް އޮންލައިންކޮށް ޝަކުވާ ހުށަހެޅޭނެ ކަމަށް އީސީ އިން ވަނީ މައުލޫމާތު ދީ ފައެވެ.

ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކތްކުރާ ކޮމެޓީގެ ވޯޓުލުން ކުރިއަށްދާނީ މިއަންނަ އޭޕްރީލް މަހުގެ 4 ވަނަ ދުވަހުގައެވެ. ހަމަ އެދުވަހުގައި ރިޔާސީ އިންތިހާބާއި މަޖިލިސް އިންތިހާބު އެއްކޮށްލުމަށް ރައްޔިތުންގެ ހިޔާލު ހޯދުމަށް ވޯޓެއް ނެގުމަށް ވެސް ވަނީ ހަމަޖެހިފަ އެވެ.

އީސީގެ ތަފާސްހިސާބުތަކުން ދައްކާގޮތުގައި މާލޭގައި 132 މަރުކަޒު، ހުޅުމާލެ ފުރަތަމަ ފިޔަވަހީގައި 34 މަރުކަޒު، ހުޅުމާލެ ދެވަނަ ފިޔަވަހީގައި 18 މަރުކަޒު އަދި ވިލިމާލޭގައި 9 މަރުކަޒެއް ގާއިމްކުރުމަށް ވަނީ ހަމަޖެހިފައެވެ. މި އިންތިހާބުގައި ޖުމުލަ 2,960 ކެނޑިޑޭޓުން ވާދަކުރާއިރު، މި އިންތިހާބަށް ވޯޓު ލުމުގެ ހައްގު ލިބިފައިވަނީ،294,937 މީހުންނަށެވެ.