އައްޑޫ ސިޓީގައި ފުޅާދާއިރާއެއްގައި މަސްތުވާތަކެތި ވިޔަފާރިކޮށް، އެކަމުން ލިބޭ ފައިސާ ލޯންޑަރކުރާކަމަށް ތުހުމަތުކުރެވޭ މައްސަލައެއްގައި ހައްޔަރުކުތި ޢަލީ ނަދީމްއާއި،އޭނާގެ ބައިވެރިން، ކުށް ސާބިތުކޮށްދެވޭ މިންވަރަށް ހެކިނެތުމުން އެމީހުން ބަންދުން ދޫކޮށްލުމަށް ޕީޖީ އޮފީހުން ފުލުހުންނަށް ލަފާދީފިއެވެ.
2017 ވަނަ އަހަރުން ފެށިގެން އައްޑޫގައި ޑުރަގު ވިޔަފާރިކޮށް އުޅޭ ކަމުގެ ތުހުމަތުގައި ނަދީމް އާއި އިތުރު 6 މީހުން ހައްޔަރުކުރީ މިދިޔަ އަހަރުގެ ނޮވެމްބަރުމަހުގައެވެ. ޕީޖީ އިން ބުނީ އެމީހުންގެ މައްޗަށް ކުރެވެނީ މައިގަނޑު ދެ ތުހުމަތެެއް ކަމަށެވެ. އެއީ؛
1. ޤާނޫނު ނަންބަރު 9/2014 (ދިވެހިރާއްޖޭގެ ޤާނޫނުލްޢުޤޫބާތު) ގެ 720 ވަނަ މާއްދާގެ ދަށުން، ކުށް ކުރާ ޖަމާޢަތެއްގައި ބައިވެރިވުމުގެ ކުށް.
2. ޤާނޫނު ނަންބަރު: 10/2014 (މަނީ ލޯންޑްރިންގ އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ޤާނޫނު) ގެ 53 ވަނަ މާއްދާގެ ދަށުން މަނީ ލޯންޑްރިންގެ ކުށް.
"މައްސަލަ ތަޙުޤީޤުކުރުމަށް ޤާނޫނުގައި ކަނޑައެޅިފައިވާ މުއްދަތު ހަމަވުމާހަމައަށް ލިބިފައިވާ ހެކި ޤަރީނާ ވަޒަންކޮށް ބެލިއިރު، މި މައްސަލާގައި ތުހުމަތުކުރެވޭ މީހުން، ކުށްކުރާ ޖަމާޢަތެއްގައި ބައިވެރިވިކަން ނުވަތަ މަނީ ލޯންޑަރކުރިކަން ޤާނޫނުގައި ކަނޑައެޅިފައިވާ މިންގަނޑަށް ސާބިތުކޮށްދެވޭ މިންވަރަށް ހެކި ޤަރީނާ ލިބިފައި ނުވެއެވެ. "
ޕީޖީ އޮފީހުން އިތުރަށް ބުނީ، ތަހުގީގުގެ މުއްދަތު ގާނޫނު ތަންދޭ އެންމެ ދިގު މުއްދަތާ ހަމައަށް އެކި ފަހަރުމަތިން ވާނީ އިތުރު ކޮށްދީފައިވާކަމަށެވެ. ނަމަވެސް، އެ މުއްދަތުގެ ތެރޭގައި ތަހުގީގު އެކަށީގެންވާ ވަރަށް ފުރިހަމަ ކުރެވި، ދައުވާ ކުރެވޭ މިންވަރަށް ހެކި ގަރީނާ ހޯދިފައި ނުވާ ކަމަށް ޕީޖީ އިން ބުނެއެވެ. މީގެއިތުރުން ޕީޖީ އިން ބުނީ ތަހުގީގުގެ މުއްދަތުގެ ތެރޭގައި ހެކި ހުށަހެޅިފައިނުވާނަމަ، ތަހުގީގީ އިދާރާއިން އެމީހުން ބަންދުން ދޫކޮށްލަން ޖެހޭނެ ކަމަށެވެ.
"އެހެންކަމުން، މި ނިންމުމާއެކު މައްސަލާގައި ތުހުމަތުކުރެވޭ މީހުންގެ ތެރެއިން ބަންދުގައި ތިބި މީހުން ބަންދުން ދޫކޮށްލުމަށް ދިވެހި ފުލުހުންގެ ޚިދުމަތަށް ލަފާދީފައިވާނެ!"
ޕީޖީ އޮފީހުން ބުނީ، ދައުވާކުރެވޭ މިންވަރަށް މިވަގުތަށް ހެކި ލިބިފައި ނުވާތީ މައްސަލަ ޑިކްލައިންކުރިނަމަވެސް، އައު ހެކި ލިބިއްޖެ ހާލަތެއްގައ އަލުން ދައުވާކުރުމަށް އެދި ހުށަހެޅުމަށް ފުލުހުންނަށް ލަފާދީފައިވާނެ ކަމަށެވެ.
