މެދުއިރުމަތީ ހަނގުރާމައިގެ ސަބަބުން ނުފުރިފައި ތިބި ފަތުރުވެރިންނަށް ރިސޯޓު ނުވަތަ ގެސްޓް ހައުސްއަށް ދެވޭނެ އިންތިޒާމު ހަމަޖައްސައިދިނުމަށް އެމްއޭސީއެލް އާއި މިނިސްޓްރީން މަސައްކަތްކުރަމުން އަންނަ ކަމަށް ޓުއަރިޒަމް މިނިސްޓަރ ތޯރިގް އިބްރާހިމް ވިދާޅުވެއްޖެ އެވެ. 

ހަނގުރާމައާ ގުޅިގެން މެދު އިރުމަތީގެ ގިނަ ދަތުރުތަކާއި އުދުހުންތައް އެއްކޮށް މެދުކަނޑާލާފައިވާއިރު، ގައުމުތަކުގެ މި ކުއްލި ނިންމުމާއި އެކު މިއަދު ރާއްޖެއިން ގައުމުތަކަށް ފުރަން އޮތް ގިނަ ފަތުރުވެރިންތަކަކަށް ވަނީ ފުރޭ ގޮތް ނުވެފަ އެވެ. އޭގެ ތެރޭގައި ގާތްގަނޑަކަށް 1400 އެއްހާ ފަތުރުވެރިން ހިމެނޭ ކަމަށް އެންވާރަމަންޓް މިނިސްޓަރ ތޯރިގް ވިދާޅުވި އެވެ.

ނުފުރި އެއާޕޯޓުގައި ތިބި ފަތުރުވެރިންގެ އަރިހަށް އެމްއޭސީއެލްގެ އެމްޑީ މުހައްމަދު ޝަރީފާއި މިނިސްޓަރ މިރޭ ވަނީ ޒިޔާރާތްކުރައްވާ އެ ފަތުރުވެރިންނަށް އިތުރު މަގުތައް ހޯދައިދިނުމުގައި އަމަލީގޮތުން ބައިވެރިވެވޑައިގެންފަ އެވެ. އެގޮތުން މިނިސްޓަރ ވިދާޅުވީ މިކަމުގައި އަމަލުކުރަމުން މި އަންނަނި ފަތުރުވެރިން ބޭނުންވާ ގޮތް އޮޅުން ފިލުވައިގެން ކަމަށެވެ.

އެގޮތުން ބައެއް ފަތުރުވެރިން ޓިކެޓު ބަދަލުކޮށް އަނބުރާ ދިއުމަށް އެދޭތީ އެ އިންތިޒާމު ވެސް ހަމަޖައްސަމުން އަންނަ ކަމަށާއި، ރާއްޖޭގައި މަޑުކުރަން އެދޭ ފަރާތްތަކަށް އެކަން އިންތިޒާމުކުރުމަށް ވެސް މިނިސްޓްރީ އާއި އެމްއޭސީއެލް އިން ގެސްޓް ހައުސްތަކާއި ރިސޯޓުތަކާ އެކު ގުޅިގެން މަސައްކަތް ކުރަމުން އަންނަ ކަމަށެވެ.

މެދުއިރުމަތީގެ ހަނގުރާމައިގެ ސަބަބުން ދަތުރުފަތުރަށް މި އައި ބަދަލާއި އެކު އެމްއޭސީއެލް އިން ވެސް ވަނީ ފުރަން ދިއުމުގެ ކުރިން ފްލައިޓްގެ ދަތުރު ކަށަވަރުކުރުމަށް އެންމެންނަށް އިލްތިމާސްކޮށްފަ އެވެ.