ހޯމް މިނިސްޓަރު އަލީ އިހުސާނުގެ އަންހެނުންނާއި ، 10 އަހަރުގެ ދަރިފުޅު މަގުމަތިން ދަނިކޮށް ވީޑިއޯ ނެގި ކަމަށް ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން އާއި އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދުގެ މައްޗަށް ތުހުމަތުކޮށްފި އެވެ.

މިނިސްޓަރު އިހުސާން އެކްސްގައި ކުރެއްވި ޕޯސްޓްގައި ވިދާޅުވީ، ޑިމޮކްރަސީއާއި، އަންހެނުންގެ ހައްގުތަކާއި، ކުޑަކުދިންގެ ހައްގުތަކަށް ވަކާލާތުކުރާ ކަމަށް ދައުވާ ކުރާ ބަޔަކު އެކުރީ ވަރަށް ދަށު ދަރަޖައިގެ އަމަލެއް ކަމަށެވެ. މިނިސްޓަރު ވިދާޅުވީ މިއީ ޒަމާނުއްސުރެ، އެމްޑީޕީން ތަމްސީލުކުރަމުން އަންނަ ހަޑި މުޑުދާރު ސިޔާސަތު ކަމަށެވެ.

މިނިސްޓަރު ވަނީ އަކްރަމް ކަމާލުއްދީނާއި  އިބްރާހިމް ވަހީދު އިތުރު މީހަކާއެކު، މަގުމަތީ ތިބެގެން ފޯނ ދިއްކޮށްގެން ތިބޭ ވީޑިއޯ އެއް ހިއްސާކުރައްވާފައެވެ. އެހެންނަމަވެސް، އެ ވީޑިއޯ އިން އެމީހުން ފޮޓޯ ނުވަތަ ވީޑިއޯ ނަގަނީ ކޮން ތަނެއްގެ ކަމެއް ސާފެއް ނުވެއެވެ.

ނަމަވެސް، މިނިސްޓަރު ވަނީ އެއީ އެދެމީހުން ކުރި ކަމެއް ކަމަށް ތުހުމަތުކުރައްވާފައެވެ.  އެތަނުގައި ތިބެގެން ވީޑިއޯކުރީ އޭނާގެ އަންހެނުންނާއި ދަރިފުޅު މަގުމަތިން ހިނގާފާދާ މަންޒަރު ކަމަށް މިނިސްޓަރު ވަނީ ވިދާޅުވެފައެވެ.

ފަހުން އެ ވީޑިއޯ ވަނީ ‘ ހަސަން ކުރުސީ’ ގެ އެކައުންޓުން ހިއްަސާކޮށްފައެވެ.ދަރިފުޅު ގޮވައިގެން ޕާކަށް ދިއުމަށްވެސް،  ބޮޑީ ގާޑުން ބޭނުންކޮށް، ރައްޔިތުންގެ ފައިސާ ބޭނުން ކުރާ ކަމަށް ކުރުސީ ހިއްސާކުރި ޕޯސްޓުގައި ވަނީ ބުނެފައެވެ.