މާލޭ ސިޓީ ކައުންސިލުން ނިންމާ ކޮންމެ ނިންމުމަކީ ކައުންސިލަރުންގެ ފުރިހަމަ އެއްބާރުލުމާއެކު ނިންމާ ނިންމުންތައް ކަމަށާއި ކައުންސިލަރުން ކުރާ ހުރިހާ ކަމެއްގެ ކްރެޑިޓް ކާލަނީ މޭޔަރު އާދަމް އާޒިމް މާލެ ސިޓީގެ ޑެޕިއުޓީ މޭޔަރު މުހައްމަދު އަރީޝް ވިދާޅުވެއްޖެއެވެ.
މާލެ ސިޓީ ކައުންސިލްގެ އާއްމު ޖަލްސާގައި ވާހަކަ ދައްކަވަމުން އަރީޝް ވިދާޅުވީ މާލޭސިޓީ ކައުންސިލްގެ ޕްރޮޖެކްޓްތަކަކީ ކައުންސިލަރުން ސައިޓްތަކަށް ގޮސްގެން ނިންމާ ޕްރޮޖެކްޓްތައް ކަމަށެވެ. އަރީޝް ވިދާޅުވީ ކައުންސިލުން ޒިންމާ ނުނަގާ 2 ޕްރޮޖެކްޓެއް ހިންގި ކަމަށާއި، އެ މަސައްކަތަށް ވީ ގޮތެއް މިއަދާއި ހަމައަށް ނޭނގޭ ކަމަށެވެ.
”ކައުންސިލުން މަސައްކަތް ނުބަލާތީވެ ،މަސައްކަތް ހިނގަމުން މި ދަނީ ޗައިނާ ބޮޑު ފާރަށް ވީ ހެން. ދިގު ދެމިގެން ގޮސް އިބްރާހީމް މުހައްމަދު ސޯލިހު ފެއްޓެވި ބްރިޖާއި އެއްގޮތަށް.”
އަރީޝް ވިދާޅުވީ މާލޭގެ ޕާކުތަކަކީ ހަގީގަތުގައި، ކައުންސިލަރުން މަސައްކަތްކޮށްގެން ފާސްކޮށްފައިވާ ތަންތަން ކަމަށެވެ.
“ގަލޮޅު ޕާކަކީ ހަގީގަތަށް ބުނާނަމަ، ގަލޮޅު ކައުންސިލަރު ނާޒިމާ އާއި، ސައިފް އާ ހުރިހާ ބޭފުޅުންގެ އިންވޯލްވްމެންޓާ އެކު ފެށިގެން ދިޔަ މަސައްކަތެއް. ނިމިގެންދިޔަ އިރު އެބޭފުޅުންނަށް ލިބުނު އެއްވެސް ކްރެޑިޓް އެއް ނެތް. ހުރިހާ ކަމެއް މޭޔަރު ކާލައިގެން ނިންމާލައިފި.”
އަރީޝް އިތުރަށް ވިދާޅުވީ، މާލޭ ގެ ފެން ހިންދުމުގެ މަސައްކަތަކީ ވެސް މޭޔަރު އާޒިމް ކުރި ކަމެއް ނޫން ކަމަށާއި އެެއީ ކައުންސިލް ކަމުގައި ހުންނެވިއިރު އޭނާ ހުށަހެޅި މައްސަލައެއް ކަމަށެވެ.
“މިތަނުން އެކަން ފާސްވެގެން ދިޔައީ އަޅުގަނޑުމެންގެ ޕީއެންސީގެ ފުލް މެޖޯރިޓީއާއެކު. އެކަމަކު ޕޯޑިއަމްތަކުގައި، ތިމަންނަ ކުރި ކަމެކޭ. ކައުންސިލުން ކުރި ކަމެއް ނޫނޭ.“
އަރީޝް ވިދާޅުވީ، ލީގަލްގައި ވެސް އެތައް މައްސަލައެއް ކުރިއަށް ނުގޮސް އެބައޮތް ކަމަށާއި، ކޮމެޓީ މަރުހަލާގައި ހުރި މައްސަލަތައް ވެސް މޭޔަރުގެ މޭޒުމަތީގައި އޮންނަތާ 7 މަސް ވެއްޖެ ކަމަަށެވެ.
ޖަލްސާގެ ތެރެއިން މޭޔަރު އާޒިމް އަދި އަރީޝްއާ ދެ މީހުންގެ ޚިޔާލު ތަފާތުވެ ޖަލްސާ ވަނީ ވަރަށް ބޮޑަށް ހޫނު ވެފައެވެ.
