ރާއްޖޭގައި ބާއްވާ އެންމެ ބޮޑު އެއް މައުރަޒު “ ދިވެހި އުފެއްދުންތެރިކަމުގެ މައުރަޒު” މިއަހަރުގެ އޮކްޓޯބަރު މަހުގައި ބޭއްވުމަށް ނިންމައިފިއެވެ.
އިގްތިސާދީ ތަރައްގީއާ ވިޔަފާރިއާ ބެހޭ ވުޒާރާ އިން ނެރުނު ނޫސްބަޔާނެއްގައި ބުނީ، 2026 ވަނަ އަހަރަކީ “ އުފެއްދުންތެރިކަމުގެ އަހަރު” ގެ ގޮތުގައި ރައީސް ޑރ މުހައްމަދު މުއިއްޒު އިއުލާން ކުރައްވާފައިވާ ކަމަށެވެ.
އެގޮތުން، މިއަހަރުގެ މައުރަޒު ކުރިއަށްދާނީ، ދިވެހި އުފެއްދުންތެރިންގެ، އުފެއްދުންތައް ދައްކާލެވޭ މައުރަޒާއެކު، ދިވެހިންގެ މަސައްކަތްތެރިކަމަށް އައިސްފައިވާ ކުރިއެރުމާއި، އުފެއްދުންތެރިކަމަށް އަންނަމުންދާ ތަރައްގީ އަދި ކުރިއެރުން ފެންނާނެ ގޮތަށް ކަމަށް އެ ވުޒާރާއިން ބުނެއެވެ.
ބިޒްނަސް ސެންޓަރ ކޯޕަރޭޝަން ( ބީސީސީ) އާ ގުޅިގެން ކުރިއަށް ގެންދާ މި މައުރަޒު އިންތިޒާމް ކުރާނީ، ވީހާ ވެސް ގިނަ ފަރާތްތަކަށް ފުރުސަތު ފަހިވާ ގޮތަށް ކަމަށް އެ ވުޒާރާއިން ވަނީ ބުނެފައެވެ. އަދި މިއަހަރުގެ މައުރަޒުގައި ބައިވެރިވުމުގެ ފުރުސަތާއި، މައުރަޒުގެ އުސޫލު މި ފެށޭ މާރިޗު މަހުގައި އާންމުކޮށް އިއުލާނު ކުރާނެ ކަމަށް އެ ވުޒާރާއިން ބުނެފައިވެއެވެ.
