އިދިކޮޅު ޕާޓީ އެއް މިހާރު ނެތް ކަމަށާއި، އެމްޑީޕީ މިހާރުވެސް އިންތިޚާބުން ބަލިވެއްޖެ ކަމަށް ޕީއެންސީގެ ކެމްޕެއިން މެނޭޖަރު އިބްރާހިމް ފަލާހު ވިދާޅުވެއްޖެ އެވެ.
ފަލާހު މިފަދައިން ވިދާޅުވީ ކުރިއަށް އޮތް ލޯކަލް ކައުންސިލުތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި ވާދަކުރައްވާ ތިނަދޫ ސިޓީގެ ކެނޑިޑޭޓުންގެ، މާލޭ ކެމްޕެއިން އޮފީސް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
“އަޅުަގަނޑު ރަމަޟާން މަހު ޕޯޑިއަމްތަކާއި ގާތް ނުވުމަށް މަސައްކަތް ކުރަން. ސަބަބަކީ އިދިކޮޅު ފަރާތްތަކުން ދައްކާ ދޮގު ނުބައި ވާހަކަތަކަށް ގޯސް އެއްޗެއް ދެންނެވިދާނެތި ޕޯޑިއަމް އާ ގާތްނުވުމަށް މި މަސައްކަތްކުރަނީ.”
ފަލާހު ވިދާޅުވީ ހަގީގަތަށް ދަންނަވާނަމަ އިދިކޮޅު ޕާޓީއެއް މިހާރު ނެތް ކަމަށެވެ.
“އެންމެ ބޮޑު އިދިކޮޅު ޕާޓީކަމަށް ވިދާޅުވާ އެމްޑީޕީ 450 ގޮނޑި އެބައޮތް ވާދަ ނުކުރައްވާ. މިއީ ރައްޔިތުން ވިސްނަންޖެހޭ ކަމެއް.”
ފަލާހު ވިދާޅުވީ، 1352 ގޮނޑި އޮތް އިރު، 450 ގޮނޑި އަށް އެމްޑީޕީ އިން ވާދަނުކުރީ، ވާދަކުރާނޭ ކެނޑިޑޭޓެއް ނެތުމުން ކަމަށެވެ.
މީގެއިތުރުން ފަލާހު ވިދާޅުވީ، އެމްޑީޕީ މެންބަރުންނަކީ އަބަދުވެސް އަމިއްލަ މަސްލަހަތަށް މަަސައްކަތް ކުރާ ބައެއް ކަމަށެވެ. އަދި ރިޔާސީ އިންތިހާބާއި މަޖިލިސް އިންތިހާބު އެއްކޮށްލަން އެމްޑީޕީ އިން ދެކޮޅު ހަދަނީ، އެ ޕާޓީގެ މަޖިލިސް މެންބަރުންތަކެއްގެ މުސާރައިން ބައެއް ގެއްލިގެންދާތީ ކަމަަށް ވެސް ފަލާހު ވަނީ ވިދާޅުވެފައެވެ.
ފަލާހު އިތުރަށް ވިދާޅުވީ، ރިޔާސީ އިންތިހާބާއި މަޖިލިސް އިންތިހާބު އެއްކޮށްލުމުން ވޯޓު ލާން ނުކުންނަ މީހުންގެ އަދަދު އިތުރުވާނެ ކަމަށެވެ.
"އެމްޑީޕީއަށް ލިބޭ 9 މިލިއަން ރުފިޔާ ވެސް ހަރަދުކުރަނީ އެމްޑީޕީގެ ވެރިންނަށް. ކޮންމެ ވެރިއަކު ލައްކައިން ކޮންމެ މަހަކު މުސާރަ ނަގަން ވެގެން،"
ފަލާހު ވިދާޅުވީ ދެނެއް އެމްޑީޕީއެއް އަލުން ކޮޅަކަށް ނުޖެހޭނެ ކަމަށާއި ރަނގަޅުވާނީ އައު އެހެން ޕާޓީއެއް އުފެއްދުން ކަމަށެވެ.
