ސަރުކާރާއި ދެކޮޅު ކައުންސިލްތަކެއް އިންތިހާބުވެއްޖެ ނަމަ، ރިޔާސީ އިންތިހާބުގައި ވެފައިވާ ވައުދުތައް ފުއްދަން ދަތިވާނެ ކަމަށް ސްޕޯޓްސް މިނިސްޓަރު އަބްދުﷲ ރާފިއު ވިދާޅުވެއްޖެ އެވެ.
މިނިސްޓަރު މިފަދައިން ވިދާޅުވީ، ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ގަލޮޅު ދެކުނު ކެމްޕެއިން ޖަގަހަ ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ. މިނިސްޓަރު ވިދާޅުވީ، ކަންކަން ކުރުމަށްޓަކައި ރައްޔިތުން ބަޔަކު އިންތިހާބު ކުރަނީ ވަކި ސިޔާސަތުތަކެއް ކަމުދާތީ ނުވަތަ އެމީހަކު ކަންކަން ކޮށްދޭނެ ކަމުގެ އިތުބާރު އޮތުމުން ކަމަށެވެ.
މީގެއިތުރުން މިނިސްޓަރު ވިދާޅުވީ، ރައްޔިތުންގެ ވޯޓުން، ރައީސް ޑރ. މުހައްމަދު މުއިއްޒު އިންތިހާބުކޮށްފައިވަނީ، އެ މަނިކުފާނުގެ ސިޔާސަތު ރައްޔިތުންނަށް ކަމުދާތީ ކަމަށާއި އެ ކަންކަން ތަންފީޒުކުރަން ރައީސް މަސައްކަތް ކުރައްވަމުން ގެންދަވާއިރު، އެ ނޫން ގޮތަކަށް މުއައްސަސާތަކުން ކަންކަން ބައްޓަން ކުރުމަކީ ދަތިވާނެ ކަމެއް ކަމަށެވެ.
"ސަރުކާރާއި އިދިކީލި ކައުންސިލްތަކެއް ހުރެއްޖެނަމަ ރައީސް މި ގައުމަށް ކުރައްވަން ބޭނުންފުޅުވާ ކަންކަން ކުރުމުގައި އަޅުގަނޑުމެންނަށް ވެސް އެކަމުގެ ދަތިކަން އިހުސާސްކުރެވޭނެ. މިކަމާއި ވަރަށް ފުންކޮށް ވިސްނަން އެބަ ޖެހޭ. ހަމަޖެހުމާއި، ތަރައްގީ އަދި ރައްކާތެރިކަން ހާސިލް ކުރުމަށްޓަކައި އެބަ ޖެހޭ އެ މަސައްކަތް ކުރެވޭނެ ބަޔަކު ހޮވަން." މިނިސްޓަރު ވިދާޅުވި އެވެ.
މިނިސްޓަރު އިތުރަށް ފާހަގަކުރެއްވި ގޮތުގައި ކަންކަން ފުރިހަމައަށް ކުރެވޭނީ ކަންކަން ކޮށްދޭން ބޭނުންވާ މީހުންނާއެކު މަސައްކަތް ކުރާނެ ރަނގަޅު ޓީމެއް އޮވެގެންނެވެ. އެހެންކަމުން، ސަރުކާރުގެ ވައުދުތައް ހަލުވިކަމާއެކު ކުރިއަށް ގެންދިއުމަށްޓަކައި ޕީއެންސީގެ ކެންޑިޑޭޓުން އިންތިހާބު ކުރަންޖެހޭ ކަމަށްވެސް ވިދާޅުވި އެވެ.
ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ގަލޮޅު ދެކުނު ކެމްޕެއިން ޖަގަހަ ރޭގަ ވަނީ ހުޅުވާފަ އެވެ. މި ޖަގަހަ ހުޅުވުމުގެ ރަސްމިއްޔާތަށް އެމްޕީންނާއި މިނިސްޓަރުންގެ އިތުރުން ރައީސުލްޖުމްހޫރިއްޔާގެ އަނބިކަބަލުން މެޑަމް ސާޖިދާވެސް ވަނީ ވަޑައިގެންފަ އެވެ.
