ރޭގެ ވަގުތެއްގައި ހުޅުމާލޭގައި ހިނގި އަލިފާނުގެ ހާދިސާއާ ގުޅިގެން ހާލުގައި ޖެހުނު އާއިލާއަކަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއޭ) އިން ވަގުތީ ބޯހިޔާވަހިކަން ފޯރުކޮށްދީފި އެވެ.
އެންޑީއޭއިން ބުނިގޮތުގައި، ރޭ ހުޅުމާލެ ފޭސް 1 ގެ އެވެނިއުގެ ހަތް ވަނަ ފަންގިފިލާގައި ހިނގި އަލިފާނުގެ ހާދިސާގައި އެތަނުގެ ބަދިގެއަށް ވަނީ ބޮޑެތި ގެއްލުންތަކެއްވެފަ އެވެ. އެހެންވެ، އެންޑީއޭއިން ވަނީ އެ އާއިލާއަށް ބޭނުންވާ ކެއިން ބުއިމާއި ވަގުތީ ބޯހިޔާވަހިކަމުގެ އެހީތެރިކަން ފޯރުކޮށްދީފައި ކަމަށްވެސް އެ އިދާރާއިން ބުންޏެވެ.
އެޕާޓްމަންޓްގައި ރޯވި ހާދިސާގައި އެއްވެސް މީހަކަށް އަނިޔާއެއް ލިބުނު ކަމުގެ ރިޕޯޓެއް ލިބިފައެއް ނުވެ އެވެ. ނަމަވެސް އެތަނަށް ލިބުނު ގެއްލުންތަކުގެ ތަފްސީލު އެންޑީއެމްއޭ އިން އަންނަނީ ބަލަމުންނެވެ.
