ރާއްޖެ ޓްރާންސްޕޯޓް ލިންކް (އާރްޓީއެލް) ފެރީގެ ހިދުމަތް ފ. އަތޮޅުާއި ދ. އަތޮޅުގައި މިއަދު ރަސްމީކޮށް ފަށައިފިއެވެ.

މި ހިދުމަތް ފެށުމަށްޓަކައި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ވަނީ އެ ދެ އަތޮޅުގައި ހާއްސަ ރަސްމިއްޔާތުތަކެއް ބާއްވާފައެވެ.

ފ. އަތޮޅުގައި މި ހިދުމަތް ރަސްމީކޮށް ފައްޓަވައިދެއްވީ އެ އަތޮޅު ނިލަންދޫގައި ބޭއްވި ރަސްމިއްޔާތެއްގައި ފ. ނިލަންދޫ ދާއިރާގެ މެމްބަރު ފާތިމަތު ސަޢުދާއެވެ. ދ. އަތޮޅުގައި ފެރީގެ ޚިދުމަތް ރަސްމީކޮށް ފައްޓަވައިދެއްވީ މީދޫގައި ބޭއްވި ރަސްމިއްޔާތެއްގައި މިނިސްޓަރ އޮފް ޓްރާންސްޕޯޓް އެންޑް ސިވިލް އެވިއޭޝަން މުހައްމަދު އަމީނެވެ.

ޖުމުލަ 6 ރޫޓަކުން ދެ އަތޮޅުގެ ރައްޔިތުންނަށް ހިދުމަތް ލިބިގެން ދާއިރު، މީގެ ތެރެއިން ރޫޓުތައް ހިމެނެނީ ފ. އަތޮޅާއި ދ. އަތޮޅު ގުޅާލާ ރޫޓުތަކުގެ ގޮތުގައެވެ. މި ހިދުމަތް ދިނުމަށް ބޭނުންކުރާނީ 48 ޕަސިންޖަރުންގެ ޖާގައިގެ ފެރީތަކެކެވެ.

ޚިދުމަތަށް އަހުލުވެރިކުރުވުމުގެ ގޮތުން މި މަހުގެ 19 އިން ފެށިގެން 24 ވަނަ ދުވަހުގެ ނިޔަލަށް ރައްޔިތުންނަށް ހިލޭ ދަތުރުކުރުމުގެ ފުރުސަތު ވަނީ ހުޅުވާލާފައެވެ. އަދި މި މަހުގެ 25 ވަނަ ދުވަހުން ފެށިގެން ދަތުރުތައް ކުރިއަށްދާނީ ޓިކެޓް ނަގައިގެންނެވެ. ޓިކެޓް ގަތުމުގެ އިންތިޒާމު އާރްޓީއެލް ވެބްސައިޓް އަދި މޯބައިލް އެޕްލިކޭޝަން މެދުވެރިކޮށް ފަސޭހަކަމާއެކު ހަމަޖެހިފައިވާނެ ކަމަށް އެމްޓީސީސީން މައުލޫމާތު ދެއެވެ.