ދިވެހި މުޖުތަމައަކީ ފަސްވަގުތު ނަމާދުކުރާ، ކުޑަކުދީންގެ ކަރާމާތް ރައްކާތެރިކުރާ، ބޮޑެތި މީހުންނަށް އިޙްތިރާމުކުރާ މުޖުތަމަޢެއްކަމުގައި ވުމަށް  ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެދިވަޑައިގެންފި އެވެ.

އެމަނިކުފާނު މިދަފައިން ވިދާޅުވީ 1447 ވަނަ އަހަރުގެ ރޯދަ މަސް ފެށުމާ ގުޅިގެން، ފޮނުއްވި ހިތާބުގައެވެ. މި ހިތާބުގައި އެމަނިކުފާނު ވަނީ، ރޯދަ މަހުގެ ތަހުނިޔާ އާއި ހެޔޮއެދުންތައް، ރައްޔިތުންނަށާއި، މުޅި އިސްލާމީ އުންމަތަށް ފޮނުއްވާފަ އެވެ.

ރައީސްގެ ހިތާބުގައި އެމަނިކުފާނު ވަނީ ރޯދައިގެ އަޅުކަން ފަރުޟުކުރެއްވީ ތަގުވާވެރިވުމަށާއި، ކުށްފާފަތަކަށް އަރައިގަތުމަށް ބިރުވެތިވެ، އެކަންކަމުން ދުރުހެލިވުމަށާއި، ތެދުމަގުގައި ސާބިތުވެ، ހެޔޮ ކަންކަންކުރުންމަތީ ދެމިތިބުމަށް ކަމަށް ވިދާޅުވެފަ އެވެ.

"މި ބަރަކާތްތެރި ހެޔޮކަމުގެ މޫސުން އަޅުގަނޑުމެންނާ ބައްދަލުކުރިއިރު، އަޅުގަނޑުމެން މުޖުތަމަޢުން ދެކެން ބޭނުންވާ، ވަރަށް ގިނަ ހެޔޮ ކަންކަން އެބަހުއްޓެވެ. ދީނީކަންކަމާއި، އާދަކާދައިގެ ކަންކަމެވެ. އުސޫލާއި ޤާނޫނާއި ގަވާއިދަށް ބޯލެނބުމެވެ" ރައީސްގެ ހިތޯބުގައި ވެއެވެ.

އެގޮތުން އެމަނިކުފާނު ވަނީ، ދިވެހި މުޖުތަމައަކީ، ފަސްވަގުތު ނަމާދުކުރާ، ކުޑަކުދީންގެ ކަރާމާތް ރައްކާތެރިކުރާ، ބޮޑެތި މީހުންނަށް އިޙްތިރާމުކުރާ މުޖުތަމަޢެއްކަމުގައި ވުމަށް އެދިވަޑައިގެންފަ އެވެ.

މީގެއިތުރުން، ދިވެހި މުޖުތަމައަކީ މަސްތުވާތަކެތިން ސަލާމަތްވެފައިވާ، ސިއްހީގޮތުން ނުރަނގަޅު އާދަތަކަށް ނޫނެކޭ ބުނާ، އަދި ހުރިހާ ކަމެއްގައި މާތްވެގެންވާ އިސްލާމްދީނުގެ އަސްލުތަކަށް ފުރިހަމައަށް ހުރުމަތްތެރިކޮށް ހިތާ، ދިވެހީންގެ ހަރުދަނާ އިސްލާމީ ސަގާފަތާއި، ދިވެހިވަންތަ، ތަހުޒީބު، އަމިއްލަ ގޮތްތައް ނަގަހައްޓާ މުޖުތަމައެއް ދެކިވަޑައިގަންނަވަން ބޭނުންފުޅުވާކަމަށް ވެސް ވިދާޅުވި އެވެ.

"ދިވެހިރާއްޖޭގެ އަމާންކަމަށްޓަކައެވެ. ދިވެހީންގެ ދެ ދުނިޔޭގެ ސަލާމަތަށްޓަކައެވެ. ހެޔޮލަފާ، ޚުލްޤު ހެޔޮ އަދި ޒަމާނާއެކު ކުރިއަރާފައިވާ ބަޔަކަށް ދިވެހީން ވުމަށްޓަކައެވެ. ދުނިޔޭގެ އެހެން މީހުންގެ ކިބައިންވެސް ދިވެހީންނަށް ހެޔޮބަސްތައް ލިބި، ދިވެހީންގެ ޤަދަރު މަތިވެރިވުމަށްޓަކައެވެ" ރައީސް ވިދާޅުވި އެވެ.

.ރައީސް ވަނީ ރޯދަ މަހަކީ، އަހުލާގުގެ އެންމެ މަތިވެރި ހުރިހާ ފިލާވަޅެއް އުނގަންނައިދޭ މައްސަރުކަމުގައިވާތީ، އަޅުކަންތައްތަކުން ވަގުތުތައް ރާވާލުމާއި، ޛިކުރުތަކުން ތަޤުވާވެރިވުމާއި، ހިތާއި ރޫޙާއި ހަށިގަނޑު، ހެޔޮ ކަންކަމުގައި ހޭދަކުރާން ދަސްކޮށްދިނުމަށް ވެސް އެމަނިކުފާނުގެ ބާރު އަޅުއްވާފަ އެވެ.

އެމަނިކުފާނުގެ ހިތޯބު ނިންމަވާލެއްވީ، ހުރިހާ ހެޔޮ ޢަމަލުތައް، ކޮންމެ މީހަކު އަމިއްލަ ނަފުސާ ހަމައިން ފަށައި، މި މާތް މައްސަރަކީ ގައުމަށް ހެޔޮ ބަދަލެއް ގެނައުމަށްޓަކައި، އަމިއްލަ ނަފްސު އެ ބަދަލާ އެއްގޮތަށް، ދީނީ، އަދި ގައުމީ އިންތަކުގެ މަތީގައި ތަރުބިއްޔަތުކުރާ މައްސަރަކަށް ހެދުމަށް ނަސޭހަތްތެރިވެވަޑައިގަންނަވަމުން ނެވެ.