މި އަހަރުގެ މިހާތަނަށް ފުލުހުންނަށް އެންމެ ގިނައިން ހުށަހަޅާފައިވަނީ މަގުމަތީގެ އެކްސިޑެންޓުތަކާއި ވައްކަމުގެ މައްސަލަތައް ކަން ދިވެހި ފުލުހުންގެ ހިދުމަތުގެ ތަފާސްހިސާބުތަކުން ދައްކައިފި އެވެ.

ފުލުހުން އާއްމުކުރި ތަފާސްހިސާބުތަކަށް ބަލާއިރު، މި އަހަރުގެ މިހާތަނަށް ޖުމްލަ 1،325 މައްސަލައެއް ވަނީ ރިޕޯޓުކޮށްފަ އެވެ. މީގެތެރެއިން އެންމެ ގިނައީ އެކްސިޑެންޓުތަކާ ގުޅުންހުރި މައްސަލަތަކެވެ. އެގޮތުން، އެކްސިޑެންޓުގެ 380 މައްސަލައެއް ހުށަހަޅާފައިވާއިރު، ވައްކަމުގެ 357 މައްސަލައެއް ވަނީ ފުލުހުންނަށް ރިޕޯޓުކޮށްފަ އެވެ. އަދި ތިންވަނައަށް އެންމެ ގިނައިން ހުށަހަޅާފައިވަނީ މަސްތުވާތަކެތީގެ މައްސަލަތަކެވެ. މި ބާވަތުގެ ޖުމްލަ 217 މައްސަލައެއް މި އަހަރުގެ މިހާތަނަށް ވަނީ ހުށަހަޅާފަ އެވެ.

ކުށްމަދު އަމާން މުޖުތަމައެއް ބިނާކުރުމަށްޓަކައި، މާލޭ ސަރަހައްދުގެ އިތުރުން އަތޮޅުތެރޭގެ ޕޮލިސް ސްޓޭޝަންތަކުންވެސް އަންނަނީ ހާއްސަ މަސައްކަތްތަކެއް ކުރަމުންނެވެ. ވަކިން ހާއްސަކޮށް، މަގުމަތީގެ ނުރައްކާތެރި އެކްސިޑެންޓުތައް މަދުކުރުމުގެ މަގްސަދުގައި، ބާރުސްޕީޑުގައި އުޅަނދު ނުދުއްވުމަށާއި މަގުމަތީގެ ގަވާއިދުތަކަށް ފުރިހަމައަށް ބޯލެނބުމަށް ފުލުހުން އަންނަނީ ތަކުރާރުކޮށް އިލްތިމާސްކުރަމުންނެވެ.