ބޮޑުތަކުރުފާނު މަގު ތަރައްގީކުރުމުގެ މަޝްރޫއުގެ މަސައްކަތްތައް ކުރިއަށްދާގޮތް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބައްލަވާލައްވައިފި އެވެ.
މި މަޝްރޫއުގެ ދެވަނަ ފިޔަވަހީގެ މަސައްކަތްތައް ބައްލަވާލެއްވުމަށް ރައީސް މިއަދު ވަނީ ބޮޑުތަކުރުފާނު މަގުގެ އުތުރު ފަރާތުން މަސްމާރުކޭޓު ސަރަހައްދަށް ވަޑައިގެން، އެ ސަރަހައްދުގެ ތަރައްގީގެ މަސައްކަތްތައް ގޮސްފައިވާ މިންވަރު ވަޒަންކުރައްވާފަ އެވެ. ރައީސް އެ ސަރަހައްދަށް ވަޑައިގަތުމުން އެމަނިކުފާނަށް މަރުޙަބާ ދެންނެވީ ހައުސިން މިނިސްޓަރު ޑރ. އަބްދުﷲ މުއްތަލިބެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލުކޮށްގެން ކުރިއަށްގެންދާ މި މަޝްރޫއުގެ ދެވަނަ ސެގްމެންޓުގެ ދަށުން، މަސްމާރުކޭޓުން ފެށިގެން ނޯތު ހާބަރުގެ ނިޔަލަށް އޮތް ސަރަހައްދު ފުޅާކޮށް، ތާރު އެޅުމަށް ވަނީ ހަމަޖެހިފަ އެވެ. ސަރުކާރުން ހާމަކުރައްވާ ގޮތުގައި، މި މަސައްކަތް އެއްކޮށް ނިމުމުން ބޮޑުތަކުރުފާނު މަގު ވެގެންދާނީ ޒަމާނީ ފެންވަރުގެ ފެންހިންދާ ނިޒާމުތައް ގާއިމުކުރެވިފައިވާ، ޓްރެފިކަށް ބޮޑު ލުޔެއް ލިބިގެންދާނެ، ދުއްވާ ތަކެއްޗަށާއި ހިނގާބިނގާވާ އެންމެހާ ރައްޔިތުންނަށް ހިތްފަސޭހަ މަގަކަށެވެ.
ބޮޑުތަކުރުފާނު މަގު ތަރައްގީކުރުމުގެ މި ބޮޑު މަޝްރޫއުގެ ތެރޭގައި، ޖުމްހޫރީ މައިދާނާއި ރަސްމީ ފާލަމާ ދެމެދު އޮތް ސަރަހައްދު، ފަޅުން ބައެއް ހިއްކައިގެން ހަތަރު ލޭނަށް ފުޅާކޮށް، ތާރު އެޅުމުގެ މަސައްކަތްތައްވެސް ހިމެނެ އެވެ.
