ލޯކަލް ކައުންސިލް އިންތިހާބުގައި ވޯޓަކާ ނުލައި މިހާތަނަށް ހަތް% ގޮނޑި ޕީއެންސީން ކާމިޔާބުކޮށްފައިވާ ކަމަށް އެ ޕާޓީގެ ކެމްޕޭން މެނޭޖަރު އިބްރާހީމް ފަލާހު ރޭ ވިދާޅުވެއްޖެ އެވެ.
އަންނަ އޭޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ އިންތިހާބުގެ އައްޑޫ ސިޓީ ކެމްޕޭން ފެށުމަށް ބޭއްވި ޖަލްސާގައި ވާހަކަދައްކަވަމުން ފަލާހު ވިދާޅުވީ، ވޯޓުލުމުގެ ކުރިންވެސް ސަރުކާރު ހިންގާ ޕާޓީން ބޮޑު ކުރިއެރުމެއް ހޯދާފައިވާ ކަމަށެވެ. އެގޮތުން މިހާރުވެސް އިންތިހާބަކާ ނުލައި 7% ގޮނޑި ކާމިޔާބު ކުރެވިއްޖެކަމަށް ފަލާހު ވިދާޅުވި އެވެ.
"ގާތްގަނޑަކަށް މިހާރު ވެސް ހަތް ޕަސެންޓު ގޮނޑި ކާމިޔާބު ކުރެވިއްޖެ، ހަތް ޕަސެންޓު، އިންތިހާބަކާ ނުލައި. އެހެންވީމާ، ދިވެހި ރައްޔިތުންގެ ތާއީދު މި ޕީއެންސީއަށް، އަޅުގަނޑުމެންގެ ރައީސުލްޖުމްހޫރިއްޔާ އަށް އޮތް މިންވަރު މި އެނގުނީ،" ފަލާހު ވިދާޅުވި އެވެ.
ކެންޑިޑޭޓުން ނަން އަނބުރާ ގެންދިއުމުގެ ސުންގަޑި އަންނަ ބުރާސްފަތި ދުވަހަށް ހަމަވާއިރު، އިންތިހާބަކާ ނުލައި ޕީއެންސީއަށް ކާމިޔާބުކުރެވޭ ގޮނޑީގެ ނިސްބަތް 10 އިންސައްތައަށް އަރާނެ ކަމަށް ފަލާހު ލަފާކުރި އެވެ. މީގެއިތުރުން، އިދިކޮޅު އެމްޑީޕީގެ ސިޔާސަތުތަކާއި އެ ޕާޓީގެ އިސްވެރިންގެ އަމަލުތައް ހުރި ގޮތުން، އެމްޑީޕީގެ ޓިކެޓުގައި ވާދަކުރާ ބައެއް ކެންޑިޑޭޓުންވެސް އެ ޕާޓީއާއެކު ކުރިއަށްދާން ބޭނުންނުވާ ކަމަށް އޭނާ ފާހަގަކުރެއްވި އެވެ.
ފަލާހު އިތުރަށް ބުނީ، ވޭތުވެދިޔަ 15 އަހަރުގެ ތެރޭގައި އައްޑޫ ސިޓީއަށް ޕީއެންސީގެ ފިކުރުގެ މޭޔަރަކު އިންތިހާބުކުރެވިފައި ނުވާތީ، އެ ސިޓީގެ ތަރައްގީއަށް ވަރަށް ބޮޑަށް އިހުމާލުވެފައިވާ ކަމަށެވެ. އެމްޑީޕީ އާއި ޕީއެންސީގެ ސިޔާސީ ވިސްނުން ތަފާތުކަން ފާހަގަކުރައްވައި، އައްޑޫގެ ތަރައްގީއަށް ވެރިކަންކުރާ ޕާޓީގެ ފިކުރު މުހިންމުކަމަށް އޭނާ ވިދާޅުވި އެވެ.
