މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ދިވެހި މަސްވެރިންނާއި އޮޑިވެރިންނަށް ޚާއްޞަކޮށްގެން ބާއްވާ "ސާބަސް ޔަންމާ ޕްރޮމޯ 2026″ ރަސްމީކޮށް އިފްތިތާހުކޮށްފި އެވެ.

މި ޕްރޮމޯޝަން އިފްތިތާހުކޮށްފައިވަނީ މިހާރު ކުރިއަށްދާ މޯލްޑިވްސް މެރިން އެކްސްޕޯގެ ހަވާސާގައި ބޭއްވި ހާއްސަ ރަސްމިއްޔާތެއްގަ އެވެ. މި ޕްރޮމޯޝަން އިފްތިތާހުކޮށްދެއްވީ އެމްޓީސީސީގެ މެނޭޖިން ޑިރެކްޓަރު މުހައްމަދު ޖަމްޝީދެވެ. މި ފެބްރުއަރީ މަހުގެ 15 ވަނަ ދުވަހުން ފެށިގެން މާޗް މަހުގެ 31 ވަނަ ދުވަހުގެ ނިޔަލަށް ކުރިއަށްދާ މި ޕްރޮމޯޝަނަކީ ކަސްޓަމަރުންނަށް ލުއިފަސޭހަ އަގުތަކެއްގައި ޔަންމާ އިންޖީނު ގަތުމުގެ ފުރުސަތު ހުޅުވާލުމުގެ ގޮތުން ކުރިއަށްގެންދާ ހަރަކާތެކެވެ. މި ޕްރޮމޯޝަންގެ ދަށުން ގަންނަ ކޮންމެ ޔަންމާ އިންޖީނަކުން 8 އިންސައްތައިގެ ޑިސްކައުންޓެއް ކަސްޓަމަރުންނަށް ލިބިގެންދާނެ އެވެ.

އެމްޓީސީސީއިން މައުލޫމާތު ދިންގޮތުގައި، މި ޕްރޮމޯޝަންގައި ބައިވެރިވެ ޑިސްކައުންޓް ހޯދުމަށްޓަކައި، މާރޗް 31 ގެ ކުރިން 10 އިންސައްތައިގެ ބުކިން ފީއެއް ދައްކައި، އިންޖީނު އޯޑަރު ކަށަވަރުކުރަން ޖެހޭނެ އެވެ. މިއަހަރުގެ މޯލްޑިވްސް މެރިން އެކްސްޕޯގެ ސްޕޮންސަރެއްގެ ގޮތުގައި ހަރަކާތްތެރިވާ އެމްޓީސީސީއިން ދަނީ މި އެކްސްޕޯގައި އެކުންފުނީގެ އައު އުފެއްދުންތަކާއި ހިދުމަތްތައް އާންމުންނަށް ތައާރަފުކުރަމުންނެވެ.

މީގެއިތުރުން، އެމްޓީސީސީގެ "ކަށަވަރު" ފޭސްބުކް ޕޭޖު މެދުވެރިކޮށް ހާއްސަ ލަކީ ޑްރޯއެއްގައި ބައިވެރިވުމުގެ ފުރުސަތުވެސް މިހާރު ވަނީ އާންމުންނަށް ހުޅުވާލާފަ އެވެ. އެމްޓީސީސީއަކީ ރާއްޖޭގެ ކަނޑުދަތުރުފަތުރާއި އިންޖީނުގެ ސިނާއަތުގައި އެންމެ އިތުބާރު ހޯދާފައިވާ އެއް ކުންފުންޏެވެ. މިފަދަ ޕްރޮމޯޝަންތަކުގެ ސަބަބުން އޮޑިވެރިންނަށާއި މަސްވެރިންނަށް ބޮޑެތި މާލީ ލުއިތަކެއް ލިބިގެންދާނެ ކަމަށް އެ ކުންފުނިން އުންމީދު ކުރެ އެވެ.