ރާއްޖޭގެ ގައުމީ ދިފާއީ ބާރު އެމްއެންޑީއެފްގެ ގާބިލުކަން އިތުރުކުރުމަށްޓަކައި ސާޗް އެންޑް ރެސްކިއުތަކަށް ބޭނުންކުރާ 17 އިންސްޕެކްޓާ ކްރާފްޓު މިއަހަރު ހިދުމަތަށް ނެރެވޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގައި މިއަހަރުގެ ރިޔާސީ ބަޔާނުގައި ރާއްޖޭގެ ދިފާއީ ރައްކާތެރިކަން ކަށަވަރުކުރުމަށް ކުރަމުންދާ މުހިއްމު މަސައްކަތްތަކަށް އަލިއަޅުވާލައްވަމުން ރައީސް ވިދާޅުވީ ކޯސްޓުގާޑުގެ ކެޕޭސިޓީ ދެގުނަ ބޮޑުކުރުމުގެ ގޮތުން ތުރުކީ ވިލާތުގެ އެހީގައި ސިފައިންގެ ހިދުމަތަށް، ތައާރަފްކުރެވުނު އެންމެ ބޮޑު މަނަވަރު މިދިޔަ އަހަރު ހިދުމަތަށް ނެރެވިފައިވާ ކަމަށެވެ. އަދި ސާޗް އެންޑް ރެސްކިއު އޮޕަރޭޝަންތަކަށް ބޭނުންވާ އިންސްޕެކްޓާ ކްރާފްޓު ހޯދުމުގެ މަސައްކަތުގެ ދަށުން މިދިޔަ އަހަތު ތިން އުޅަނދު ހިދުމަތަށް ނެރެވިފައިވާ ކަމަށެވެ
ރައީސް ވިދާޅުވީ އެ މަސައްކަތުގެ ދަށުން މިއަހަރު އިތުރު 17 އިންސްޕެކްޓާ ކްރާފްޓު ހިދުމަތަށް ނެރެވޭނެ ކަމަށެވެ.
އެއާއެކު، ދެ ހާބަ ކްރާފްޓު ޕެޓްރޯލް ވެސަލް ހޯދުމަށް ޖަޕާން ސަރުކާރުން ފައިސާގެ އެހީ ދިނުމަށް ވެސް ނިންމާފައިވާ ކަމަށާއި ރާއްޖޭގެ އެސްއީޒެޑް ބެލެހެއްޓުމަށް އޮސްޓްރޭލިއާ ސަރުކާރުގެ އެހީގައި ހޯދާ މަނަވަރު ވެސް މި އަހަރު ހިދުމަތަށް ނެރެވޭނެ ކަމަށް ރައީސް ވިދާޅުވި އެވެ.
މީގެއިތުރުން، ދިފާއީ ބާރުގެ ހުރިހާ ދާއިރާތަކެއްގެ ފެންވަރު މަތިކޮށް، ހިދުމަތްތައް ހަރުދަނާކުރުމަށް ފާއިތުވި އަހަރުވެސް ސަރުކާރުން މުހިންމު ފިޔަވަޅުތަކެއް އަޅާފައިވާ ކަމަށެވެ. އެގޮތުން، ކޯސްޓްގާޑުގެ ހިދުމަތް ދެގުނައަށް ފުޅާކުރުމަށް ކުރެވޭ މަސައްކަތުގެ ދަށުން، ތުރުކީ ސަރުކާރުގެ ހިލޭ އެހީގައި ލިބުނު، ރާއްޖޭގެ އަސްކަރިއްޔާގައި މިހާތަނަށް ބޭނުންކުރަން ފެށި އެންމެ ބޮޑު ޑްރޯން މިދިޔަ އަހަރު ހިދުމަތަށް ނެރެފައިވާކަން އެމަނިކުފާނު ފާހަގަކުރެއްވި އެވެ.
އަސްކަރިއްޔާގެ ވައިގެ ބާރު ތަރައްގީކުރުމަށް ކުރެވޭ މަސައްކަތްތަކަށް އަލިއަޅުއްވާލައްވަމުން ރައީސް ވިދާޅުވީ، އައްޑޫ ސިޓީ ގަމުގައި ރާއްޖޭގެ ފުރަތަމަ އެއާ ސްޓޭޝަން މިދިޔަ އަހަރު ގާއިމުކޮށްފައިވާ ކަމަށެވެ. އަދި ރާއްޖޭގެ އުތުރު ސަރަހައްދު ބެލެހެއްޓުމަށްޓަކައި ށ. ފުނަދޫގައި އެއާ ސްޓޭޝަނެއް ބިނާކުރުމުގެ މަސައްކަތްވެސް މިހާރު ކުރިއަށްދާ ކަމަށް ރައީސުލްޖުމްހޫރިއްޔާ ވިދާޅުވިއެވެ.
